ზარზმასთან 67 წლის კაცი ხევში გადავარდა და გარდაიცვალა

შემთხვევა, დაახლოებით, 15:20 საათზე მოხდა. იგი ამ დროს კლასელებთან ერთად მანქანით უტყისუბნიდან ადიგენის მიმართულებით მიდიოდა.

„ტყეში იყვნენ გასულები მეგობრებთან ერთად, მანქანა გააჩერებინა და გადავიდა, რომ არ დაბრუნდა ძებნა დაუწყეს და ნახეს, რომ 40 მეტრის სიმაღლიდან მდინარეში იყო ჩავარდნილი“, – ამბობენ ადგილობრივები.

მათი თქმით, კაცის გარდაცვალების მიზეზი სავარაუდოდ გულის შეტევა გახდა: „ამ ადგილზე წყალი ისეთი სიღრმის არ არის, რომ ვინმე დაიხრჩოს“.

მერის წარმომადგენელი სოფელ ზარზმაში გურამ გავაშელი კი ამბობს, რომ გარდაცვლილს სავარაუდოდ ფეხი დაუსხლტა: „როცა მივედი უკვე სასწრაფო სამედინიცო დახმარების და პოლიციის ბრიგადები იყვნენ მისული“.

გარდაცვლილი 1951 წელსაა დაბადებული. წარმოშობით სოფელ კახარეთიდან იყო და ქუთაისში ცხოვრობდა.

გარდაცვლილი უკვე პროზექტურაში გადაიყვანეს.

შინაგან საქმეთა სამინისტროში განმარტავენ, რომ გამოძიება სსკ-ის 115 მუხლით მიმდინარეობს, რაც თვითმკვლელობამდე მიყვანას გულისხმობს.

[თინათინ ზაზაძე, ადიგენი]