23 წლის ბიჭი დის ცემის ბრალდებით პასუხისგებაში მისცეს

35 წლის ქალი გვიყვება, რომ რვა წლის წინ ძალადობის გამო ქმარს გაშორდა, მას შემდეგ ადიგენში დედასთან და ძმასთან ერთად ცხოვრობს, თუმცა ორ დეკემბერს აქაც ფიზიკური ძალადობის მსხვერპლი გახდა.

„რვა წლის წინ გავშორდი ქმარს და მას შემდეგ დედაჩემთან ვცხოვრობ. რამდენიმე კვირის წინ ერთი ბიჭი გავიცანი. დავმეგობრდით, ტელეფონზე მწერდა და მირეკავდა. ორ დეკემბერს საღამოსაც დამირეკა, ჩემმა ძმამ გამოართვა ტელეფონი, სიტყვიერი შეურაცხყოფა მიაყენა, მერე მე დამარტყა მუშტი სახეში და თავში. ცემის ეს უკვე მესამე ფაქტია. მე ცუდი არაფერი ჩამიდენია, უბრალოდ გავიცანი და ვემეგობრებოდი იმ ბიჭთან“, – გვიყვება 35 წლის ქალი და ამატებს, რომ მას ფსიქიკური ჯანმრთელობის პრობლემები აქვს. ამ ყველაფერმა კი თავი მას შემდეგ იჩინა, რაც მასზე ქმარმა ფიზიკურად არაერთხელ იძალადა – „ყოველთვის მცემდა, მაშინაც კი როცა ორსულად ვიყავი. რომ არ მოგატყუოთ სულ პირველად ჩემს ქმარს მე დავარტი, ოთახში ყვირილით შემოვარდა საქონელს სალაფავი რატომ არ გაუკეთეო“.

35 წლის ქალს რომ ფსიქიკური პრობლემები აქვს, ამაზე დედაც საუბრობს: „ეს პრობლემები ქმართან ცხოვრებისას დაეწყო, ცუდად ექცეოდა და მაგან იმოქმედა“.

დედა ირმწუნება, რომ ორ დეკემბერს, როცა მისმა გოგომ პოლიციაში დარეკა ძმას არ უცემია: „პირიქით, ეს იყო აგრესიული, ჩემს ბიჭს უთქვამს ტელეფონი მომეციო ის კი ხელით ითრევდა, ამიტომ ჰკრა ბიჭმა ხელი და იმან კედელზე ამოშვერილ ჭიკარტაზე მიარტყა თავი, სულ ეს იყო. ამ კამათის მერე დავმშვიდდით, ოთახში ვიყავით, ვსაუბრობდით უცებ პოლიცია მოვიდა. მერე გავიგეთ, რომ ჩემს გოგოს დაურეკავს“.

35 წლის ქალი კი აცხადებს, რომ ეს ძმის მხრიდან მასზე ფიზიკური ძალადობის მესამე შემთხვევა იყო: „დედა სიმართლეს არ ამბობს, ჩემმა ძმამ ნამდვილად მცემა, მაგრამ ვაპატიე და შევრიგდით უკვე“.

ორ დეკემბერს მომხდარი ძალადობის ფაქტზე ადიგენის რაიონული სამმართველოს თანამშრომლებმა 23 წლის ბიჭი დააკავეს. მომხდარს შსს სსკ–ის 126–ე, ძალადობის მუხლით იძიებს.

პროკურატურა ბრალდებულისთვის აღკვეთის ღონისძიებად პატიმრობის შეფარდებას ითხოვდა, თუმცა სასამართლომ ეს შუამდგომლობა არ დააკმაყოფილა და ბრალდებული გირაოს სანაცვლოდ გაათავისუფლა.

[თინათინ ზაზაძე, ადიგენი]