'სერვერმა ვერ გაუძლო' - სესხების ჩამოწერის ვებ-გვერდი ჯერ არ მუშაობს

ფონდ "ქართუში" ამბობენ, რომ საიტი გაშვებულია, თუმცა დატვირთვის გამო შეფერხებით მუშაობს.

“საიტი გაშვებულია, სიები ატვირთულია, მაგრამ იმდენად ბევრა ადამიანმა მიმართა ერთდროულად, რომ სერვერმა ვერ გაუძლო”, - ამბობს რადიო თავისუფლებასთან “ქართუს” დირექტორი ნიკოლოზ ჩხეტიანი.

ზუსტად როდის ამუშავდება საიტი, ამაზე ჩხეტიანს პასუხი არ აქვს, თუმცა ვარაუდობს, რომ მომხმარებელთა რაოდენობის შემცირების შემთხვევაში ვებ-გვერდი ჩვეულებრივად იმუშავებს: “ჰაკერულ შეტევას ჰგავს, ისეთი მდგომარეობაა".

Vali.ge სესხების განულების ინიციატივის ფარგლებში შეიქმნა, რომელიც მთავრობამ არჩევნების მეორე ტურამდე რამდენიმე დღით ადრე დააანონსა. ინიციატივის თანახმად, მოქალაქეს ვადაგადაცილებული სტატუსის სესხი ჩამოეწერება, თუ მას აქვს ვალი, რომლის ძირი თანხაც 2 000 ლარს არ აღემატება და სულ მცირე ერთი წელია, სესხის ნაწილი არ გადაუხდია.

[sknews.ge]