ოპოზიცია არჩევნების შედეგების გასაჩივრებას გეგმავს

გაერთიანებული ოპოზიციის საპრეზიდენტო კანდიდატის, გრიგოლ ვაშაძის განცხადებით, ისინი არჩევნების ლეგიტიმურობას არ სცნობენ და ამიტომ სასამართლოს მიმართავენ: "ჩვენი იურისტები ამზადებენ სარჩელს, რომელსაც შევიტანთ ჩვენ სასამართლოში. ჩემი მოთხოვნაა არჩევნები იქნეს ცნობილი ბათილად. ამას არ შევურიგდებით", – განაცხადა აქციაზე გრიგოლ ვაშაძემ.

გარდა ამისა, გაერთიანებული ოპოზიცია ხელისუფლებას სამუშაო ჯგუფის შექმნას სთავაზობს და ვადას 16 დეკემბრამდე აძლევს.

"ჩვენ ხელისუფლებას ვთავაზობთ: შექმენით სამუშაო ჯგუფი, თუნდაც ხუთი კაცის შემადგენლობით. ჩვენც ზუსტად ამავე რაოდენობით შევქმნით ჩვენს დელეგაციას და სამოქალაქო საზოგადოების დაკვირვების ქვეშ, ცივილიზებულად, სამართლებრივად დავჯდეთ და ერთად გამოვიდეთ ამ პოლიტიკური კრიზისიდან. ვადას გაძლევთ 16 დეკემბრამდე. სწორედ ამ პასუხზე იქნება დამოკიდებული ჩვენი შემდეგი ნაბიჯები", – აღნიშნა ვაშაძემ.

რუსთაველზე შეკრებილ ხალხს ვიდეო ჩართვის საშუალებით მიმართა ყოფილმა პრეზიდენტმა მიხეილ სააკაშვილმა.

"მე ვარ ერთ-ერთი თქვენთაგანი. არ მაქვს განსაკუთრებულობაზე პრეტენზია. მაგრამ მინდა იცოდეთ: იმ წამს, როგორც კი დაგჭირდებით და დამიძახებთ, იმ წამს ფიზიკურად გავჩნდები თქვენს გვერდით, ჩვენი ლიდერების, ახალგაზრდობის გვერდით, რადგან თითოეულმა უნდა ჩავდოთ ჩვენი აგური ამ გამარჯვებაში", – აღნიშნა სააკაშვილმა.

თბილისში, რუსთაველზე ოპოზიციის საპროტესტო აქცია 15:00 საათზე დაიწყო. აქციაზე სიტყვით გამოდიან ოპოზიციის ლიდერები.

შეგახსენებთ, რომ აქციაზე მხარდამჭერები ახალციხიდანაც წავიდნენ.

[sknews.ge]