არჩევნების მეორე ტური 28 ნოემბერს, ოთხშაბათს გაიმართება

გადაწყვეტილება ცესკოში გაერთიანებული ოპოზიციის წარმომადგენლებისა და ცენტრალური საარჩევნო კომისიის თავმჯდომარის კამათის ფონზე დაამტკიცეს. ცესკომ გადაწყვეტილება ცხრა ხმით მიიღო.

სხდომა, სადაც ეს გადაწყვეტილება მიიღეს, ოპოზიციამ კამათის შემდეგ დატოვა.

საზღვარგარეთის უბნებში, 20:00 საათის ნაცვლად, 24:00 საათამდე გაგრძელდება საარჩევნო პროცესი.

როგორც “ერთიანი ნაციონალური მოძრაობის” წევრები ამბობენ, ცესკოში დღევანდელ დისკუსიას, რასაც არჩევნების თარიღის გამოცხადება მოჰყვა, “აზრი არ ჰქონდა”, რადგან ეს თარიღი უკვე წინასწარ იყო დადგენილი “ქართული ოცნების” მიერ.

14 ნოემბერს თბილისის მერმა კახა კალაძემ, რომელიც ამავე დროს “ქართული ოცნების” გენერალური მდივანია, არჩევნების თარიღი იქამდე დაასახელა, სანამ ცესკო თარიღს გამოაცხადებდა.

საქართველოში მოქმედი სამი სადამკვირვებლო ორგანიზაცია – “საერთაშორისო გამჭვირვალობა-საქართველო”, სამართლიანი არჩევნებისა და დემოკრატიის საერთაშორისო საზოგადოება” და “საქართველოს ახალგაზრდა იურისტთა ასოციაცია” – ცესკოს არჩევნების შაბათს დანიშვნისაკენ მოუწოდებდა.

სხდომის შემდეგ ცესკომ 28 ნოემბერი უქმე დღედ გამოაცხადა.

[sknews.ge]