რადიო ნორი: ნინოწმინდაში მიხეილ სალუაშვილი მიხეილ სააკაშვილში აერიათ

ამის შესახებ ინფორმაციას ადგილობრივი რადიო ნორი ავრცელებს. მედიის ინფორმაციით მიხეილ სალუაშვილს ნინოწმინდაში წინასაარჩევნო კამპანია არ უწარმოებია, შესაბამისად ადგილობრივები მას არც იცნობენ. მაგალითად, სოფელ ხანჩალში რადიო ნორს ერთ–ერთმა ადგილობრივმა უთხრა, რომ მას მიხეილ სალუაშვილისთვის ხმა არ მიუცია და არჩევანი მიხეილ სააკაშვილზე გააკეთა. მას შემდეგ, რაც ჟურნალისტისგან გაიგო, რომ სააკაშვილი საპრეზიდენტო კანდიდატების სიაში არ იყო, თქვა: „მე კიდევ მეგონა რომ სააკაშვილი იყო“.

სოფელ ჯიგრაშენში ერთ–ერთი მცხოვრები ამბობს, რომ მან ბიულეტენში მიხეილ სააკაშვილი ნამდვილად ამოიკითხა, მაგრამ მისთვის არ მიუცია და სხვა შემოხაზა.

საპრეზიდენტო კანდიდატმა მიხეილ სალუაშვილმა საპრეზიდენტო არჩევნებზე სულ 2 970 ხმა დააგროვა. მათ შორის ყველაზე მეტი, 87 ხმა ნინოწმინდის საარჩევნო ოლქში მიიღო.

მიხეილ (გელა) სალუაშვილი, არჩევნებში მონაწილეობის მიზეზს ასე აღწერს: „დღეს ჩვენ მეორედ მოსვლის წინარე ეპიზოდში ვცხოვრობთ, ამ მდგომარეობაში სახელმწიფოს მეთაური ღმერთის ნების აღმსრულებელი უნდა იყოს“.

მან საარჩევნო პროგრამას „გაბრწყინებული საქართველოსთვის“ დაარქვა, დევიზად კი „უფალი ჩვენი სიმართლეა“ ჰქონდა.
მის საარჩევნო პროგრამაში ვკითხულობთ, რომ მთავარია 1. ჩვენი ცხოვრების ყველა სფეროში სამართლიანობისა და კანონის უზენაესობის აღდგენა-დამკვიდრება; 2. ქვეყანაში პოლიტიკურად სტაბილური გარემოს შექმნა, და 3. კეთილმეზობლურ პრინციპებზე დაფუძნებული სამშვიდობო მისიის განხორციელება.

სალუაშვილის საარჩევნო პროგრამა მხოლოდ ქართულ ენაზე იძებნება.

მიხეილ (გელა) სალუაშვილიმა ნინოწმინდის ოლქში ხმების თითქმის 1 პროცენტი (0,92 % – 87 ხმა) მიიღო, ამ შედეგით ნინოწმინდაში გადაასწრო ისეთ კანდიდატებს, როგორებიც არიან შალვა ნათელაშვილი (0,2 %), კახა კუკავა, (0,27 %) ზურაბ ჯაფარიძე (0,16 %) და დავით უსუფაშვილი (0,07 %).

[sknews.ge]