უნივერსიტეტში სტუდენტური თვითმმართველობის წევრები შეარჩიეს

სამცხე–ჯავახეთის უნივერსიტეტის სტუდენტური თვითმმართველობის პრეზიდენტთან მირზა ბურძენიძესთან თვითმმართველობაში გაწევრიანების მსურველი სტუდენტების გასაუბრება ექვსი საათის განმავლობაში მიმდინარეობდა.

„მინდა საინტერესო ადამიანების მოწვევა ლექციების წასაკითხად. ეს სტუდენტურ ცხოვრებას უფრო საინტერესოს გახდის", – ამბობს სამართლის მეორე კურსის სტუდენტი დონარი ლონდარიძე, რომელსაც სტუდენტურ თვითმმართველობაში გაწევრიანება სურს.

ვალერი ჭრელაშვილი ერთ–ერთია იმ 37 სტუდენტს შორის, რომელიც თავისუფალ დროს თვითმმართველობასთან ერთად სხვადასხვა ღონისძიებების მოწყობას გეგმავს: „სპორტულ ღონისძიებებში ვაპირებ ჩაბმას. ვთვლი, რომ თითოეულმა სტუდენტმა უნდა შექვმნათ სტუდენტური გარემო“.



თვითმმართველობა ხუთი განხრით იმუშავებს, ესენია – სპორტის, კულტურის, საზოგადოებასთან ურთიერთობის, იურიდიული და განათლების კომიტეტები.

„სტუდენტები ინოვაციური იდეებით მოდიან და ჩემი მიზანია მომავალი კვირიდან კონკრეტულ საკითხებზე დავიწყოთ მუშაობა“, – ამბობს სტუდენტური თვითმმართველობის პრეზიდენტი მირზა ბურძენიძე.

სპორტული თუ შემეცნებითი ღონისძიებების განსახორციელებლად სტუდენტური თვითმმართველობისთვის ყოველწლიურად უნივერსიტეტის ბიუჯეტიდან გარკვეული თანხაა გათვალისწინებული. გასულ წელს ახალგაზრდებისთვის 20 000 ლარი იყო გაწერილი, მიმდინარე წლის ბიუჯეტი კი ცნობილი რამდენიმე კვირაში გახდება.



[ავთო ინასარიძე, ახალციხე]