უნივერსიტეტში სტუდენტური თვითმმართველობის პრეზიდენტს აირჩევენ

სამცხე–ჯავახეთის სახელმწიფო უნივერსიტეტში თვითმმართველობის წევრების არჩევნები უკვე ჩატარდა. სტუდენტებმა საკუთარი ფაკულტეტებიდან 21 წევრი აირჩიეს. მათ შორის, ბიზნესის ადმინისტრირების ფაკულტეტიდან – ექვსი, იურიდიული ფაკულტეტიდან – ხუთი, ინჟინერიის, აგრარულ და საბუნებისმეტყველო მეცნიერებათა ფაკულტეტიდან – ორი, განათლების, ჰუმანიტარულ და სოციალურ მეცნიერებათა ფაკულტეტიდან – რვა.

„არჩევნებმა მშვიდ ვითარებაში, დარღვევების გარეშე ჩაიარა. მონაწილეობა 200–მდე სტუდენტმა მიიღო“, – ამბობს რეგისტრატორი, სამართლის ფაკულტეტის სტუდენტი ნინო ჩაგუნავა.

უნივერსიტეტში სტუდენტური თვითმმართველობის პრეზიდენტს თვითმმართველობის 21 წევრი აირჩევს. სწორედ მათ შორის დასახელდებიან 14 ივნისს პრეზიდენტობის კანდიდატები. მათ შორის პრეზიდენტი ხმათა უმრავლესობით ერთი წლის ვადით აირჩევა.

ჰუმანიტარული ფაკულტეტის სტუდენტი ზურა თურქაძე, რომელიც გასულ წელს თვითმმართველობის წევრი იყო, ფიქრობს რომ თვითმმართველობამ სკოლის მოსწავლეებთან აქტიურად უნდა იმუშაოს. ამის შესახებ მან გადაცემა „ავანგარდში“ ისაუბრა: „სკოლის მოსწავლეებს უფრო მეტი ინფორმაცია უნდა ჰქონდეთ უნივერსიტეტზე, ახალციხე საუნივერსიტეტო ქალაქია და მათ აქ ჩაბარება უნდა სურდეთ".

სამცხე–ჯავახეთის სახელმწიფო უნივერსიტეტის ადმინისტრაციაში აცხადებენ, რომ თვითმმართველობის ინიციატივებს დააფინანსებენ, თუმცა მხოლოდ იმ შემთხვევაში თუ სტუდენტები ამა თუ იმ განსახორციელებელი გეგმის შესახებ შესაბამის პროექტს წარადგენენ.

„არ მახსენდება თვითმმართველობას გასართობ–შემეცნებითი ღონისძიებების გარდა, თანხა სამეცნიერო კვლევებისთვის მოეთხოვათ. მინდა აღვნიშნო, რომ ნებისმიერ სტუდენტს შეუძლია პროექტის განხორციელება და აუცილებელი არ არის თვითმმართველობის წევრები იყვნენ. საკმარისია მათ დაასაბუთონ თუ რატომ სურთ ამა თუ იმ პროექტის განხორციელება და ადმინისტრაცია მათ გვერდში დაუდგება“ – ამბობს სამცხე–ჯავახეთის უნივერსიტეტის ადმინისტრაციის ხელმძღვანელი როინ თათეშვილი.

[ავთო ინასარიძე, ახალციხე]