ნინოწმინდაში ზურაბიშვილის განცხადებაზე დაწერილი საჩივარი ცესკომ არ დააკმაყოფილა

„აქამდე მოქალაქეობის მინიჭება იყო მხოლოდ პრეზიდენტის გადაწყვეტილებით. ერთმა პრეზიდენტმა, რომლის წარმომადგენელიც არის ჩემი ოპონენტი, ძალიან ბევრი მოქალაქეობა დაურიგა თურქებს, მაგრამ თქვენ არ მოგცათ მოქალაქეობა”, – ასე მიმართა სალომე ზურაბიშვილმა ნინოწმინდაში შეხვედრაზე მყოფ ეთნიკურად სომეხ მოსახლეობას.

ზურაბიშვილის განცხადებაში ISFED საარჩევნო კოდექსის 45-ე მუხლის მე-3 პუნქტის დარღვევას ხედავს, რომლის მიხედვითაც, საარჩევნო პროგრამა არ უნდა შეიცავდეს საქართველოს ტერიტორიული მთლიანობის დარღვევისკენ, ეროვნული შუღლისა და მტრობისკენ, რელიგიური და ეთნიკური დაპირისპირებისკენ მოწოდებას.

„ამ განცხადებით დაირღვა საარჩევნო კოდექსით დადგენილი მოთხოვნები. კერძოდ განცხადება შეიცავდა უკანონო აგიტაციის ნიშნებს და ასევე შეიცავდა ეროვნული შუღლის გაღვივების საფრთხეს, რაც ეწინააღმდეგება დემოკრატიული და სამართლებრივი სახელმწიფოს პრინციპებს. პრეზიდენტობის კანდიტადს უფლება არ აქვთ ისეთი პროგრამა ჰქონდეს, რომელიც შეიცავს ომის და ძალადობის პროპაგანდას. ჩვენ მივიჩნიეთ, რომ ამ შემთხვევაში გამოხატვის თავისუფლების შეზღუდვა დაშვებული იყო“, – გვითხრა სამართლიანი არჩევნების იურისტმა თათია ქინქლაძემ.

თუმცა, ცენტრალურმა საარჩევნო კომისიამ ISFED-ის საჩივარი არ დააკმაყოფილა. როგორც ცესკოში აცხადებენ, შეხვედრის აუდიოჩანაწერის მიხედვით, პრეზიდენტობის კანდიდატი საუბრობს თანასწორობის, ტოლერანტობისა და მოქალაქეობის მნიშვნელობაზე.

„პრეზიდენტობის კანდიდატი საუბრობს თანასწორობაზე, ტოლერანტობაზე, მოქალაქეობის მნიშვნელობაზე და ასევე საუბარი ეხება ორმაგი მოქალაქეობის სამართლებრივი რეგულირების საკითხს. საარჩევნო ადმინისტრაციამ დეტალურად შეისწავლა მოწოდებული ინფორმაცია და ზემოაღნიშნულიდან გამომდინარე არ დასტურდება საარჩევნო კოდექსის 45–ე მუხლის მე–3 პუნქტით დადგენილი მოთხოვნების დარღვევა, შესაბამისად არ არსებობს ადმინისტრაციული სამართალდარღვევის ოქმის შედგენის სამართლებრივი საფუძვლები“, – აცხადებენ ცესკოს საზოგადოებასთან ურთიერთობის სამსახურში.

აღნიშნულ საკითხთან დაკავშირებით ნინოწმინდის ოლქში საჩივარი შეიტანა ახალგაზდა იურისტთა ასოციაციის გორის ოფისის ხელმძღვანელობამაც, თუმცა ამ დრომდე, ეს საკითხი ოლქს არ განუხილავს.

[თინათინ ზაზაძე, ახალციხე]