საია ნინოწმინდის საოლქოს ზურაბიშვილის ქსენოფობიური განცხადების შესწავლას სთხოვს

საქმე ეხება ორ ოქტომბერს, ნინოწმინდაში სალომე ზურაბიშვილის წინასაარჩევნო შეხვედრას, სადაც მან უარყოფით კონტექსტში ისაუბრა, ყოფილი პრეზიდენტის მიხეილ სააკაშვილის მიერ თურქებისთვის საქართველოს მოქალაქეობის მინიჭებაზე.

„სავარაუდოდ, სახეზეა წინასაარჩევნო აგიტაციის გაწევა კანონის მოთხოვნათა დარღვევით. შესაბამისად, ყოველივე ზემოაღნიშნულიდან გამომდინარე, გთხოვთ, თქვენი კომპეტენციის ფარგლებში, შეისწავლოთ განცხადებაში აღწერილი ფაქტობრივი გარემოებები და მოახდინოთ შესაბამისი სამართლებრივი რეაგირება“, – ნათქვამია „ახალგაზრდა იურისტთა ასოციაციის“ გორის ოფისის მიერ საარჩევნო ოლქში შეტანილ განცხადებაში.

საიას გორის ოფისის ხელმძღვანელის ქეთი ბებიაშვილის განმარტებით, დარღვევით წინასაარჩევნო აგიტაციაში მონაწილეობის მიღება გამოიწვევს დაჯარიმებას 2 000 ლარის ოდენობით.

შეგახსენებთ, რომ საპრეზიდენტო კანდიდატი სალომე ზურაბიშვილი, ორ ოქტომბერს, ნინოწმინდაში გამართულ შეხვედრაზე, ეთნიკურად სომეხ მოსახლეობას ორმაგი მოქალაქეობის მიღების შესახებ ესაუბრა და აღნიშნა, რომ „ნაციონალური მოძრაობის“ ხელისუფლებაში ყოფნის დროს, წინა პრეზიდენტმა ეთნიკურად თურქ მოსახლეობას საქართველოს მოქალაქეობის მიღების უფლება მისცა, ეთნიკური სომხები კი დღემდე ამ პრობლემის წინაშე დგანან.

აღნიშნულ ფაქტთან დაკავშირებით, 15-მა არასამთავრობო ორგანიზაციამ განცხადება გაავრცელა, რომლის თანახმადაც, სალომე ზურაბიშვილის ზემოაღნიშნული მიმართვა შეიცავს უკანონო აგიტაციის ნიშნებს.

[თინათინ ზაზაძე, ნინოწმინდა]