მიტროპოლიტი: ‘როცა შენი ქვეყნის საზღვრებს ვერ აკონტროლებ, მარიხუანას კულტივაცია დაუშვებელია’

მიტროპოლიტი თეოდორე აცხადებს, რომ ეკლესიის პოზიცია შეუვალია – არ შეიძლება საქართველოში კანონით იყოს დაშვებული მარიხუანას კულტივაცია: „შეიძლება სხვა ქვეყნებში მიზანშეწონილია სამედიცინო მიზნებისთვის, მაგრამ როცა ჩვენი ქვეყანა არის მეოთხე ადგილზე ნარკოტიკებისადმი მიდრეკილი ადამიანების რაოდენობის კუთხით, ვფიქრობ მის კულტივაციაზე საუბარიც კი ზედმეტია“.

შეკითხვაზე, რატომ სვამს ტოლობის ნიშანს ნარკოტიკსა და მარიხუანას შორის, მიტროპოლიტი გვპასუხობს: „არ არსებობს მსუბუქი და ძლიერი ნარკოტიკი, ყველა ნარკოტიკი არის ბოროტება, ყველა ნარკოტიკი არის ადამიანის დეგრადაციის გამომწვევი. მარიხუანაზე კი ამბობენ, რომ მსუბუქი ნარკოტიკიაო, მაგრამ რატომ არის მსუბუქი?! ის კლავს ტვინის უჯრედებს, პირდაპირ მოქმედებს ადამინის ფსიქიკაზე, ადამიანის გამრავლებაზე და კიდევ ძალიან ბევრ ფაქტორზე“.

მიტროპოლიტი ფიქრობს, რომ პარლამენტში პროექტის განხილვის შეჩერების მიზეზი მხოლოდ ეკლესიის პროტესტი არაა: „ეს არ იყო მხოლოდ ეკლესიის პროტესტი, ეს იყო საზოგადოების პროტესტი. კანაფის კულტივაციის პროექტზე ჩვენ გვაქვს ჩვენი პოზიცია და ხელისუფლებას თავისი, მაგრამ ვერ ვიტყვი ამ შემთხვევაში, რომ მთლიან ხელისუფლებას. ანუ ვერ ვიტყვი, რომ მთლიანი ხელისუფლება და ეკლესია სხვადასხვა მხარეს დგას“.

შეკითხვაზე, რა მოლოდინი აქვს, გაიტანს თუ არა ხელისუფლება აღნიშნულ კანონპროექტს განსახილველად პარლამენტში არჩევნების შემდეგ, მიტროპოლიტი გვპასუხობს: „არ ვიცი, მაგას ვერ გეტყვით ნამდვილად“.

[თამუნა უჩიძე, ახალციხე]