გზა, სასაკლაო და სასმელი წყალი – რაზე ესაუბრნენ გუბერნატორს ჯავახეთში

შეხვედრები, 4 სექტემბერს, ახალქალაქისა და ნინოწმინდის მუნიციპალიტეტების მერიებში გაიმართა.

„მუნიციპალიტეტს არ გააჩნია საქონლის სასაკლაო და ვუთხარით, რომ გვჭირდება. ასევე, საჭიროა ტექნიკა სოფლის მეურნეობაში. ვისაუბრეთ სოფელ ეშტიამდე მისასვლელ გზაზე, რომლის რეაბილიტაციაც მუნიციპალური განვითარების ფონდის მხარდაჭერით მიმდინარეობს, მაგრამ დროში ჭიანურდება“, – ამბობს ნინოწმინდის მუნიციპალიტეტის მერი ანივარდ მოსოიანი და ამატებს, რომ კარგი იქნება თუ რეგიონული განვითარების ფონდიდან ნინოწმინდის მუნიციპალიტეტისთვის მეტი თანხა გამოიყოფა – „ამიტომ ეს საკითხიც დავაყენეთ გუბერნატორთან“.

ახალქალაქის მუნიციპალიტეტში კი სამსახურების უფროსებმა ყურადღება სასმელი წყლის მოწესრიგებისა და საბავშვო ბაღების მშენებლობის საჭიროებაზე გაამახვილეს.

„ასევე, ვისაუბრეთ სოფლებამდე მისასვლელ გზებზე, ბევრ სოფელში გზა ძალიან ცუდ მდგომარეობაშია“, – ამბობს ახალქალაქის მუნიციპალიტეტის მერი იური უნანიანი.

სამხარეო ადმინისტრაციაში აცხადებენ, რომ გუბერნატორი მსგავსი სახის შეხვედრებს სხვა მუნიციპალიტეტებშიც გამართავს.

[მარიამ ბარძიმაძე, ნინოწმინდა]