ბორჯომის გამგებელი - ვცდილობთ ბორჯომში მოძრაობა არ შეფერხდეს

„კაცი, რომელიც გამოირჩეოდა სისასტიკით, რომლის პოლიციის უფროსობის პერიოდში ძალიან ბევრი არასამართლიანად დააპატიმრეს, რომელიც ახორცილებდა სერიოზულ ზეწოლას წინასაარჩევნო პერიოდშიც, ფაქტობრივად ტერორისტი იყო რა, გამოუშვეს და ცხადია ძალიან სერიოზული რეაქცია მოჰყვა ამ ფაქტს“, - აცხადებს დიმიტრი ბერიძე.

მისივე თქმით, გამგეობა ცდილობს ბორჯომში მოძრაობა აღდგეს და გადაკეტილი გზა გაიხსნას, თუმცა, ხალხის შეკავება და მათი გადაწყვეტილების შეცვლა არც თუ ისე ადვილია: „უამრავი ხალხია გამოსული, გადაკეტილი აქვთ ქუჩები და მათი შეჩერება ასე ადვილი არ არის“.

გამგებელი ყოფილი პოლიციის უფროსის გათავისუფლებას სუბიექტურ გადაწყვეტილებას უწოდებს: „ეს იყო ნამდვილად გაუმართლებელი, ეს იყო პირდაპირი დაკვეთა, ნიშანი „ნაციონალური მოძრაობისა“, რომ კიდევ არსებობენ. ისინი აწყობენ საბოტაჟს, ცდილობენ დისონანსი შემოიტანონ მოსახლეობაში და უნდათ დთესონ შიში, იმ სახით, რომ აი მამუკა ხვედელიანი გამოუშვეს, კრიმინალი და გეშინოდეთ“.

შეგახსენებთ, ერთ საათზე მეტია ბორჯომში ადგილობრივები და "ქართული ოცნების" აქტივისტები ყოფილი პოლიციის უფროსის, მამაკაცის გაუპატირებაში ბრალდებული მამაუკა ხვედელიანის პატიმრობიდან გათავისუფლებას აპროტესტებენ. მათ თბილისისა და ბაკურიანისკენ მიმავალი გზა გადაკეტეს.

[Sknews.ge]