მუსლიმები ყურბან-ბაირამის დღესასწაულს აღნიშნავენ

ყურბან–ბაირამი მშვიდობის, ადამიანზე მზრუნველობისა და ბოროტებაზე სიკეთის განმარჯვების დღესასწაულია. ამ დღეს მუსლიმები დილით ლოცვას აღავლენენ შემდეგ კი შინაურ ცხოველებს მსხვერპლად სწირავენ.

მსხვერპლშეწირვისთვის ერთი ან რამდენიმე მუსლიმის ოჯახი იკრიბება და პირუტყვს კლავს, შემდეგ კი საქონლის ხორცს თანაბრად ანაწილებს.

დღესასწაულზე დაკლული ცხოველის ხორცი სამად ნაწილდება, ერთი გაჭირვებულებს ურიგდებათ, ერთიც მეზობლებს, განურჩევლად რწმენისა და აღმსარებლობისა, ხოლო ერთს ოჯახში იტოვებენ. შესაწირი ცხოველი აუცილებლად უნდა იყოს ჯანმრთელი.

ჭელის მეჩეთის წინამძღვარი ჯამბულ აბულაძე ამბობს, რომ სადღესასწაულო ლოცვა დილის 07:00 საათზე აღავლინეს, ახლა პირუტყვის დასაკლავად ემზადებიან.

ყურბან-ბაირამობა მარხვის თვის, რამაზან ბაირამიდან 70-ე დღეს აღინიშნება.

[sknews.ge]