საგამოძიებო სამსახური ვითიბი ბანკში დოკუმენტების გაყალბების ფაქტებს იძიებს

ფინანსთა სამინისტროს საგამოძიებო სამსახურში აცხადებენ, რომ მათ ძიება ვითიბი ბანკიდან შესული განცხადების საფუძველზე დაიწყეს.

საქმის მასალების მიხედვით, ერთ–ერთი კრედიტ ოფიცერი იმისთვის რომ მომხმარებლებს ბანკიდან მეტი სესხი მიეღოთ, მათ სახელფასო ცნობებს აყალბებდა და შემოსავალში მეტ თანხას უთითებდა. გამოძიება მის მიერ სხვა დოკუმენტების გაყალბების შესაძლო ფაქტებსაც სწავლობს. იგი სამსახურიდან ვითიბი ბანკის სათაო ოფისმა გაათავისუფლა. თუმცა, ამ ფაქტის შემდეგ სამსახურის დატოვება ვითიბი ბანკის ახალციხის ფილიალის მმართველმა დავით სუხიაშვილმაც გადაწყვიტა.

„ესეც რომ არ მომხდარიყო, განცხადების დაწერას და წამოსვლას მაინც ვგეგმავდი, 9 წელია ახალციხეში ვარ და თბილისში მინდოდა დაბრუნება ოჯახთან. ისევე, როგორც მე, რაც ეს ამბავი მოხდა, საკუთარი განცხადების საფუძველზე ბანკი კიდევ ერთმა თანამშრომელმა დატოვა“, – ამბობს სუხიაშვილი.

მისი თქმით, ის გამოძიებას ამ დრომდე არ დაუკითხავს: „ჩემთან არანაირი პრეტენზია არ აქვს არავის. არავინ ამ საქმეში გარეული არ არის“.
სუხიაშვილი საქმის დეტალებზე არ საუბრობს. „სამხრეთის კარიბჭის“ შეკითხვებს არც ბანკის სათაო ოფისში უპასუხეს: „წერილობით გამოითხოვეთ და გიპასუხებთ“.

ფინანსთა სამინისტროს საგამოძიებო სამსახურში ამბობენ, რომ ამ დრომდე პასუხისგებაში არავინ მიუციათ.

[თამუნა უჩიძე, ახალციხე]