13 აგვისტოდან მეორე ტიპის დიაბეტის მედიკამენტებზე ფასები განახევრდება

ჯანდაცვის მინისტრის განმარტებით, პროგრამაში, რომელიც მოწყვლადი მოსახლეობისათვის სამედიცინო დანახარჯების შემცირებას გულისხმობს, ჩაერთვება ყველა სააფთიაქო ქსელი, იშვიათი გამონაკლისების გარდა.

"მეორე ტიპის დიაბეტზე იყო ერთ-ერთი ყველაზე მაღალი ფინანსური ტვირთი მოსახლეობის. სამი მთავარი მედიკამენტი, რომელიც „კარგად კეტავს“ ამ მეორე ტიპის დიაბეტს, ესენი არის: „მედფორმინი“, „გლიკლაზიდი“ და „გინეპლიდი“. მაისში უკვე დაიწყო გაიაფება და ერთ -ერთი ყველაზე ძვირიანი და მოთხოვნადი მედიკამენტი „მედფორმინი“ მოსახლეობას 13 აგვისტოდან შეეძლება, რომ პრაქტიკულად ნახევარ ფასში შეიძინოს", – განაცხადა ჯანდაცვის მინისტრმა დავით სერგეენკომ.

მისი თქმით, სამ მედიკამენტზე, რომელიც მეორე ტიპის დიაბეტის სამკურნალოდ გამოიყენება, წელიწადში მოსახლეობა ხარჯავდა 10 მილიონს.

"ამ ინტერვენციის შემდეგ უკვე მომავალი კვირიდან დაიხარჯება 5 მილიონი და ხაზს ვუსვამ, რომ ეს ეხება ყველას, კატეგორიების მიუხედავად“, - განაცხადა დავით სერგეენკომ.

[sknews.ge]