ავტომაგისტრალზე მომხდარ ავარიაში ახალციხელი დედა–შვილი მოყვა

„მეძინა და ძლიერმა რყევამ გამაღვიძა, თვალები რომ გავახილე დედაჩემს ცხვირიდან სისხლი სდიოდა. სახე მეც სისხლიანი მქონდა. არ ვიცი რა მოხდა და ავარია რამ გამოიწვია, გარშემო ყველა კიოდა“, – გვიყვება გოგო, რომელიც ახალციხე–რუსთავის ავტობუსს ახალციხიდან დედასთან ერთად გაყვა.

მისი თქმით, ორივე მათგანი სასწრაფო სამედიცინო დახმარების ჯგუფმა მცხეთის საავადმყოფოში გადაიყვანა: „სხეულზე მეც და დედასაც დაჟეჟილობები გვაქვს, მე ტუჩიც გამიკერეს. ასევე, ორივემ მსუბუქი ტვინის შერყევა მივიღეთ. ჯერ საავადმყოფოში ვართ, არ ვიცით როდის გაგვწერენ“.

როგორც დაშავებული ამბობს, მცხეთის საავადმყოფოში სამცხე–ჯავახეთიდან სულ სამი მგზავრი მოხვდა: „მე არ ვარ რეგიონში ჩაწერილი, ამიტომ მუსხიდან მხოლოდ დედა დაფიქსირდა. ჩვენთან ერთად არის კიდევ ერთი ქალი ჭობისხევიდან, ის გამარჯვებაშია გათხოვილი და სახლში მიდიოდა. მისი მდგომარეობა შედარებით მძიმეა, ოპერაცია ჩაუტარდა და ჯერ ისევ რეანიმაციაშია“.

აგანგებო სიტუაციების კოორდინაციისა და გადაუდებელი დახმარების ცენტრის ინფორმაციით, ოპერაცია ავარიისას დაშავებულ სამ მგზავრს ჩაუტარდა და სამივეს მდგომარეობა მძიმეა, თუმცა მკურნალობას ექვემდებარება.

ავარიის შემდეგ მცხეთის საავადმყოფოში სულ 10 დაშავებული შეიყვანეს. როგორც "სამხრეთის კარიბჭეს" კლინიკაში განუცხადეს მათ შორის ორი მართვით სუნთქვაზეა: "გუშინ ოპერაცია ჩაუტარდათ და დღეს იმყოფებიან კრიტიკული მედიცინის განყოფილებაშაში. ერთმა პაციენტმა უარი თქვა სამედიცინო მომსახურებაზე და გაეწერა იმ დღესვე. 7 პაციენტის მდგომარეობა დამაკმაყოფილებლია და იმყოფებიან ქირურგიულ განყოფილებაში".

ახალციხე–რუსთავის ავტობუსი, ახალციხიდან 14:00 საათზე გავიდა და თბილისი–სენაკი–ლესელიძის ავტომაგისტრალზე ტრაილეს შეეჯახა. შემთხვევის შედეგად 26 წლის ბიჭი გარდაიცვალა, 13 ადამიანი კი დაშავდა. დაშავებულებს შორის ექვსი ბავშვია.

[თამუნა უჩიძე, ახალციხე]