ახალციხის რეფერალურ ჰოსპიტალს ახალი დირექტორი ჰყავს

კეკლაშვილი მუშაობას პირველი აგვისტოდან შეუდგა. ამ დრომდე დირექტორის მოვალეობას კლინიკის სამედიცინო მენეჯერი ვასილ ბალახაშვილი ასრულებდა. ბალახაშვილი კვლავ მენეჯერის პოზიციაზე რჩება.

კეკელაშვილი პროფესიით ექიმი–ენდოკრინოლოგია, თუმცა 2004 წლიდან ძირითადად მენეჯერულ პოზიციებზე მუშაობდა.

„ვმუშაობდი ჯანდაცვის სამინისტროს აპარატში, შემდეგ სამედიცინო საქმიანობის სახელმწიფო რეგულირების სააგენტოში სხვადასხვა პოზიციაზე, ვიყავი მონიტორინგის სამმართველოს უფროსი, ასევე, აკრედიტაციის სამმართველოს უფროსი. ასევე, ვმუშაობდი დაავადებათა კონტროლის ეროვნულ ცენტრში, სადაც ვიყავი ქრონიკული დაავადებების და დედათა და ბავშვთა და გარემოს ჯანმრთელობის და ტრავმატიზმის სამმართველოს ხელმძრვანელი. 2013 წლიდან პირველ აგვისტომდე ვმუშაობდი კლინიკა „ენმედიცის“ გენერალური დირექტორის მოადგილედ“,– გვიყვება კეკელაშვილი.

ახალადდანიშნული დირექტორი ამბობს, რომ ახალციხეში სერვისის გაუმჯობესების კუთხით ბევრი გეგმა აქვს: „მათ განხორციელებას საკმაოდ დიდი რესურსი სჭირდება. მთავრია, რომ ჩვენს პაციენტებს მაქსიმალური მომსახურება გაეწიოთ ადგილზე“.

ახალციხის რეფერალური ჰოსპიტალის დირექტორის პოზიცია 2017 წლის დეკემბრამდე ელდარ ალიევს ეკავა.

[მარიამ ბარძიმაძე, ახალციხე]