ბორჯომელ ნიკოლოზ გუმბერიძეს ‘112–ის გმირი ბავშვის’ წოდება მიენიჭა

საგანგებო სიტუაციების სამსახურის ინფორმაციით, ნიკოლოზ გუმბერიძე 112-ს ბორჯომიდან დაუკავშირდა და დახმარება ითხოვა ქალისთვის, რომელსაც ლამპიონი დაეცა. ქალს თან ჩვილი ბავშვი ჰყავდა.

ამის შესახებ, 112–ის ოფიციალურ facebook-ის გვერდზე წერია: "ნიკოლოზი არ დაიბნა და მიუხედავად ასეთი მძიმე შემთხვევისა, ოპერატორს დეტალური ინფორმაცია მიაწოდა. განსაკუთრებით აღსანიშნავია, რომ მან განმეორებითაც დარეკა და ოპერატიულად დახმარებისა და ქალბატონის გადარჩენისთვის დიდი მადლობა გადაუხადა“.

ნიკოლოზ გუმბერიძე შინაგან საქმეთა სამინისტროს გადაუდებელი დახმარების ოპერატიული მართვის ცენტრმა „112-ის გმირი ბავშვების“ წოდებით დააჯილდოვა.

მასთან ერთად ასეთივე წოდება მიიღო კიდევ ოთხმა მოზარდმა: ირაკლი მეტრეველმა, ლიზი დარსალიამ და ლიზი ლეჟავამ.

პროექტი „112-ის გმირი“ 2016 წლიდან შინაგან საქმეთა სამინისტროს სსიპ „112“-ის ინიციატივით ხორციელდება. პროექტის ფარგლებში, ყოველ წელს ჯილდოვდება ყველა ის მოზარდი, რომელმაც უმაღლესი მოქალაქეობრივი პასუხისმგებლობა გამოჩინა და კარგად იცის, თუ როგორ უნდა მოიქცეს გადაუდებელ შემთხვევებში.

[sknews.ge]