მუსხში მცხოვრებ 'მარო ბებოს' 'ცოცხალი საუნჯის' წოდება მიენიჭა

სიმბოლური საჩუქრები და სერთიფიკატი მარიამ ჟუჟუნაძეს კულტურული მემკვიდრეობის დაცვის ეროვნული სააგენტოს დირექტორმა ნიკოლოზ ანთიძემ გადასცა. მან მარიამ ჟუჟუნაძეს სააგენტოს სახელით მადლობა გადაუხადა გაწეული შრომისთვის და სამომავლო საქმიანობაში დახმარებას დაჰპირდა.

როგორც კულტურული მემკვიდრეობის დაცვის ეროვნული სააგენტოს წარმომადგენელმა მაკა თაქთაქიშვილმა აღნიშნა, მარიამ ჟუჟუნაძე საქართველოში პირველი ქალბატონია, რომელიც აღნიშნული წოდებით დაჯილდოვდა.

„მარო ბებო საქართველოში პირველი ქალბატონია, რომელიც ამ წოდებით დავაჯილდოვეთ. მას თავის სფეროში აქვს აღმატებული ცოდნა და უნარ-ჩვევები, საყოველთაოდ აღიარებული ეროვნულ დონეზე, როგორც ტრადიციის საუკეთესო შემნახველი და გადამცემი“, – აღნიშნა მაკა თაქთაქიშვილმა.

ღონისძიებას ახალციხის მუნიციპალიტეტის გამგებელი ზაზა მელიქიძე, საკრებულოს თავმჯდომარე დავით ლომიძე, სახალხო არტისტი ნათელა იაძე, მუნიციპალიტეტის თანამშრომლები და საჯარო სკოლების წარმომადგენლები ესწრებოდნენ.







[მანანა სარაშვილი, ახალციხე]