რვა ქუჩის მოასფალტების საქმეზე მუშები დაკითხეს

რვა ქუჩის მოასფალტების საქმეზე სხდომა, დღეს, 17 ივლისს გაიმართა. პროცესზე მშენებელი კომპანიის შპს „არალის“ მუშები დაკითხეს. ახალციხეში რვა ქუჩის მოასფალტებისთვის „მესხეთავტოგზასთან“ კონტრაქტი გაფორმებული სწორედ „არალს“ ჰქონდა.

2013 წელს, მაშინ როცა „მესხეთავტოგზა“ ახალციხეში რვა ქუჩაზე ასფალტს აგებდა, პარალელურად ქალაქში საგზაო სამუშაოებს, ოღონდ სხვა ქუჩებზე და სხვა პროექტით „არალიც“ ახორციელებდა.

დღეს სასამართლოში დაკითხული შპს „არალის“ მუშები სწორედ ამ პერიოდში, ასპინძის ქუჩის მიმდებარედ მუშაობდნენ. მათთან დაცვისა და ბრალდების მხარეებს შეკითხვები ძირითადად იმის შესახებ ჰქონდათ, თუ ვინ იყვნენ მაშინ მათი ხელმძღვანელები და რა მითითებებს ღებულობდნენ ისინი უფროსისგან.

დარბაზში დაკითხულმა ალექსანდრე შიუგამ და გიორგი გელაშვილმა განაცხადეს, რომ მათ უშუალოდ შპს „არალის“ დირექტორი ოთარ თათეშვილი ხელმძღვანელობდათ და მათ „მესხეთ ავტოგზის“ უფროსთან თამაზ პეტაშვილთან შეხება არ ჰქონიათ.

მოწმე გიორგი გელაშვილი სამშენებლო სამუშაოების წარმოების დროს სატვირთო მანქანის მძღოლიც იყო. ამიტომ მხარეები იმითაც დაინტერესდნენ, იგი „არალთან“ ერთად უზიდავდა თუ არა სამშენებლო მასალებს გვერდით მომუშავე „მესხეთავტოგზასაც“, რაზეც გელაშვილმა უპასუხა, რომ მსგავს ფაქტს ადგილი არ ჰქონია.

ამ დროისათვის, ახალციხის რაიონულ სასამართლოში, რვა ქუჩის მოასფალტების საქმეზე 40–მდე მოწმეა დაკითხული, მათ შორის სადავო ქუჩებზე მომუშავე მუშები, ინსპექტორ–გამომძიებლელბი და საქმის მთავარი მოწმე ოთარ თათეშვილი. დასაკითხი დარჩა 10–მდე მოწმე.

შემდეგი სასამართლო სხდომა 7 სექტემბერს 13:00 საათზე გაიმართება.

შეგახსენებთ, რომ ახალციხეში, 2013 წელს, რვა ქუჩის მოასფალტების საქმეზე ბიზნესმენი ოთარ თათეშვილი ფინანსთა სამინისტროს საგამოძიებო სამსახურმა 26 ოქტომბერს, ამავე უწყებაში დაკითხვის შემდეგ დააკავა. მას ბრალი ორი მუხლით წაუყენეს: 182–ე მუხლის მესამე ნაწილი, – დიდი ოდენობით თანხის მითვისება–გაფლანგვა და 299–ე მუხლის პირველი ნაწილი – სასარგებლო წიაღისეულის უკანონოდ მოპოვება.

აღნიშნულ საკითხთან დაკავშირებით ფინანსთა სამინისტროს საგამოძიებო სამსახურმა პასუხისგებაში კიდევ ოთხი პირი მისცა: ახალციხის მუნიციპალიტეტის გამგეობის ინფრასტრუქტურის სამსახურის ყოფილი სპეციალისტები: გია ქასრაშვილი და რევაზ მერაბიშვილი, ასევე, შპს „მესხეთ ავტოგზას“ დირექტორი თამაზ პეტაშვილი და შპს „რენესანსი 77-ის“ ყოფილი თანამშრომელი ნოდარ ბალახაშვილი. მათ შორის სამთან საპროცესო გარიგება გაფორმდა, შპს „მესხეთ ავტოგზის“ საქმე კი სასამართლოს არსებითი განხილვისთვის გადაეცა.

[ლუბა გიორგაძე, ახალციხე]