უნივერსიტეტში თვითმმართველობის პრეზიდენტი აირჩიეს

თვითმმართველობის პრეზიდენტს თვითმმართველობის გუნდის 27 წევრიდან ირჩევენ. კანდიდატების დასახელება თვითმმართველობაში შემავალ ფაკულტეტების წარმომადგენლებს შეუძლიათ. მას შემდეგ რაც ფაკულტეტების გუნდები, რომელშიც 5 ან 6 წევრია, პრეზიდენტობის კანდიდატებს დაასახელებენ, პრეზიდენტის ასარჩევად ფარული კენჭისყრა ტარდება.

ამჯერად, კანდიდატი მხოლოდ ორმა გუნდმა დაასახელა. პრეზიდენტობისთვის ინჟინერიის, აგრარულ და საბუნებისმეტყველო მეცნიერებათა ფაკულტეტის მესამე კურსის სტუდენტი ზაზა ზედგინიძე და ბიზნესის ადმინისტრირების ფაკულტეტის ასევე მესამე კურსის სტუდენტი ანი ოქრომელიძე იბრძოდნენ. 27 კანდიდატიდან 22-მა ზედგინიძეს დაუჭირა მხარი.
ზედგინიძე პრეზიდენტად ორი წლის ვადით აირჩიეს.

ზედგინიძე ამბობს, რომ არაერთი ღონისძიების განხორციელებას აპირებს: ”დაგეგმილი გაქვს სპორტული, საგანმანათლებლო, კულტურული ღონისძიებები. ასევე, ლაშქრობები და ექსკურსიები აქტიური სტუდენტებისთვის”.

თვითმმართველობის ყოფილ პრეზიდენტს არჩევნებში მონაწილეობა არ მიუღია. იგი თვითმმართველობიდან იქამდე წავიდა, ვიდრე გუნდის არჩევნები ჩატარდებოდა. შეგახსენებთ, რომ თვითმმართველობის გუნდის არჩევნები 26 თებერვალს გაიმართა. 1256 სტუდენტიდან მაშინ არჩევნებში 650-მა სტუდენტმა მიიღო მონაწილეობა.

[ნუკა სტეფნაძე, ახალციხე]