ლომჯარია – ‘სარალიძე იმყოფება იქ, სადაც თავს გრძნობს უსაფრთხოდ’

ოპოზიციის წარმომადგენელმა გიორგი ვაშაძემ, ასევე მალხაზ მაჩალიკაშვილმა აქციაზე განცხადებები გააკეთეს და მოითხოვეს ინფორმაცია იმის თაობაზე თუ სად არის ზაზა სარალიძე. აქციის ერთ-ერთმა ორგანიზატორმა ზვიად კუპრავამ აღნიშნა, რომ მას სარალიძემ აქციის დაწყებისას SMS მისწერა და უთხრა, რომ დემონსტრაციაზე მისვლას აპირებდა, თუმცა ამის შემდეგ არ გამოჩენილა.

მოგვიანებით, საქართველოს სახალხო დამცველმა ნინო ლომჯარიამ ბრიფინგი გამართა და განაცხდა, რომ სარალიძე უსაფრთხოდაა. მისი თქმით, თუ სარალიძეს ექნება სურვილი თავად იტყვის სად იმყოფება. როგორც ლომჯარია ამბობს, მან არ იცის შეუერთდება თუ არა სარალიძე რომელიმე აქციას.
შეკითხვაზე, დატოვა სარალიძემ ვაკის პარკში მიმდინარე აქცია, სახალხო დამცველმა უპასუხა: "ის გადაღლილია და მძიმე ემოციურ მდგომარეობაშია, ამიტომ აქციის დატოვების გადაწყვეტილება თავად მიიღო".

ლომჯარიამ ისაუბრა იმაზეც, რომ ომბუდსმენის აპარატი ხვალიდან დაიწყებს ხორავას საქმეზე მომხდარი გამოძიების მონიტორინგს და ინფორმაციას ყოველდღიურ რეჟიმში მიაწვდის საზოგადოებას. მისივე თქმით, შინაგან საქმეთა სამინისტროდან აქამდე მიმდინარე სისხლის სამართლის საქმის მასალებიც გამოითხოვეს.

[sknews.ge]