ფაშინიანის ვიზიტი ჯავახეთში დასრულდა [Photo]

ბოლო შეხვედრა სომხურ დიასპორასთან სომხეთის პრემიერ მინისტრმა ნიკოლ ფაშინიანმა ახალქალაქში კულტურის სახლში გამართა.

„გუშინ შევხვდი საქართველოს პრემიერ მინისტრს გიორგი კვირიკაშვილს, ჩვენ საპროტოკოლო დოკუმენტები გვერდზე გადავდეთ და ძალიან გულწრფელად ვისაუბრეთ. სომხეთს სოლიდარობა უნდა მეზობელ საქართველოსთან. ჩვენ ურთიერთობებს ახალი ფორმულა უნდა დაედოს საფუძვლად. ქართველი ხალხი უნდა იყოს დარწმუნებული იმაში, რომ სომხეთის მხრიდან მუქარა და აგრესია არასდროს იქნება“, – განაცხადა ახალქალაქის კულტურის სახლში ადგილობრივებთან შეხვედრისას ნიკოლ ფაშინიანმა.

მისი თქმით, სომხეთის ხავერდოვანი რევოლუცია, არა მხოლოდ სომხეთის, არამედ საქართველოს გამარჯვებაცაა: „დარწმუნებული ვარ, რომ სომეხი ხალხი ააყვავებს ნებისმიერ კუთხეს. მჯერა, რომ ჯავახეთში მცხოვრები სომხები დიდი ენთუზიაზმით მოეკიდებიან საქართველოს აღმშენებლობის საქმეს“.

ფაშინიანთან ერთად შეხვედრას საქართველოს საგარეო საქმეთა მინისტრი და სამცხე–ჯავახეთის გუბერნატორი ესწრებოდნენ.
„ძალიან მნიშვნელოვანია ორი მეზობელი ქვეყნის კეთილმეზობლური ურთიერთობა, ამ თვალსაზრისით პრემიერის ვიზიტს დიდი მნიშვნელობა აქვს“, – ამბობს სამცხე–ჯავახეთის გუბერნატორი კახა სამხარაძე.

მიუხედავად იმისა, რომ დღეს საღამოს ახალქალაქში წვიმდა, ადგილობრივები ფაშინიანის მოლოდინში მაინც არ დაიშალნენ.
„დავსველდი, მაგრამ არ წავიდოდი ისე, თუ ფაშინიანს არ ვნახავდი. ის ძალიან კარგი ადამიანია და მჯერა, რომ სომხეთში კორუფციას დაამარცხებს“, – ამბობს ახალქალაქის მკვიდრი გოჰარ უნანიანი.

შეგახსენებთ, რომ სომხეთის პრემიერ მინისტრი ნიკოლ ფაშინიანი დღეს, 31 მაისს ჯავახეთში სომხური დიასპორის წარმომადგენლებთან შეხვედრებს მართავდა. ფაშინიანი საქართველოს ოფიციალური ვიზიტით გუშინ, 30 მაისს ეწვია.















[sknews.ge]