როგორ აღნიშნავენ სამცხე–ჯავახეთში ბავშვთა დაცვის დღეს

ახალციხე

ბავშვთა დაცვის საერთაშორისო დღესთან დაკავშირებით ახალციხის ცენტრალურ პარკში ღონისძიება 14:00 საათზე დაიწყება. აქ პატარები ზღაპრების გმირებს შეხვდებიან. საშუალება ექნებათ მოიხატონ სახე, ასევე მოხატონ ასფალტი და მონაწილეობა მიიღონ სპორტულ ღონისძიებებში.

თოჯინების თეატრი პატარებისთვის სპექტაკლს „დათუნია დრუნჩას“ გამართავს, ადგილობრივი ცეკვისა და სიმღერის ანსამბლები კი კონცერტს ჩაატარებენ. ასევე, ცენტრალურ ბიბლიოთეკაში გაიმართება ინტელექტუალური „თამაში რა? სად როდის?“.

ხალხური ცეკვის სკოლა-აკადემიის ანსამბლი "ნაბადი არტი" და ხალხური სიმღერის გუნდი "ირმისა", პარკში გამართავს კონცერტს სახელწოდებით "ჯანმრთელი ახალგაზრდა თაობა ძლიერი ქვეყნის მომავალია." დასრულდება ჰელიუმის ბუშტების გაშვებით ღონისძიება.

ბორჯომი

ბორჯომში ღონისძიებები 12:00 საათზე, ბორჯომის თოჯინების სახელმწიფო თეატრის სპექტაკლით – „ზერბინო უკარება“ დაიწყება. მთელი დღის განმავლობაში ცენტრალურ პარკში ატრაქციონები ბავშვებისათვის უფასო იქნება. ასევე, ცენტრალურ პარკში პატარებს ჯამბაზების შოუ, მხიარული მსვლელობა, აკრობატის ტრიუკები და სხვა თეატრალური ნომრები ელით. ღონისძიებები 16:00 საათზე პატარების პოდიუმზე გამოსვლით დასრულდება.

ადიგენი

ადიგენში ღონისძიებები 11:00 საათზე მერიის შენობის მიმდებარე ტერიტორიაზე დაიწყება. ადიგენში პატარების გასართობად დილიდანვე იქნებიან ზღაპრების გმირები. დღის მეორე ნახევარში კულტურის სახლთან არსებული მუსიკალური ჯგუფები კონცერტს გამართავენ. მლაშეს საჯარო სკოლის მოსწავლეები კი ფლეშმობს მოაწყობენ.

ასპინძა

ასპინძაში სადღესასწაულო ღონისძიებები ცენტრალურ პარკში გაიმართება. 15:00 საათზე აქ ადგილობრივი ფოლკლორული და ქორეოგრაფიული ანსამბლები საკუთარ შემოქმედებას წარმოადგენენ. ასევე, მოეწყობა სკოლის მოსწავლეებისა და შშმ პირების ნახატების გამოფენა. ღონისძიებაში მონაწილეობას საბავშვო ბაღის აღსაზრდელები მიიღებენ.

ნინოწმინდა

ნინოწმინდაში ბავშვთა დაცვის დღესთან დაკავშირებული ღონისძიებები ფოკის მონასტერში წირვით დაიწყება. შემდეგ კი ნინოწმინდის მზრუნველობამოკლებულ ბავშვთა სახლის მოსწავლეები კონცერტს გამართავენ.

ახალქალაქი

ახალქალაქში ღონისძიებები 13:00 საათზე დაიწყება და მასში მონაწილეობას „მომავლის სახლის“ ბავშვები მიიღებენ. პატარები ქართულ და სომხურ ენებზე სიმღერებს შეასრულებენ. ასევე, იცეკვებენ ადგილობრივი ქორეოგრაფიული ანსამბლები. იაპონური, ქართული, სომხური, იტალიური, ფრანგული და სხვა ქვეყნის ეროვნულ ტანსაცმელში გამოწყობილი პატარები სხვადასხვა ენაზე მიესალმებიან სტუმრებს და იმღერებენ.

[მარიამ ბარძიმაძე, სამცხე–ჯავახეთი]