სოფლებში კომპიუტერული ცენტრების გასახსნელად ემზადებიან

სამოქალაქო რეესტრის წარმომადგენლებმა 24 მაისს სოფლის რწმუნებულებთან და მოსახლეობასთან საინფორმაციო შეხვედრა გამართეს. შეხვედრა იმ სოფლებში შედგა, სადაც კომპიუტერული ცენტრის გახსნა იგეგმება, ასეთი მუნიციპალიტეტის მასშტაბით ორი სოფელია: სხვილისი და აწყური.

აღნიშნული სოფლის მოსახლეობას ცენტრის წარმომადგენლებმა უკვე დაურიგეს ანკეტები, რის საფუძველზეც ”კომპიუტერის ცოდნის გამავრცელებელი საზოგადოების” თანამშრომლებს შეარჩევენ. ანკეტების შედეგად შერჩეულ მონაწილეებს კომპიუტერის ცოდნის უნარ-ჩვევებშიც შეამოწმებენ.

სოფელ აწყურიდან კონკურსში მონაწილეობის ასამდე მსურველია.
ღუღუნი ჩინჩხაშვილი მაღაზიაში გამყიდველად მუშაობს. ამბობს, რომ კონკურსში მონაწილეობას თავად არ აპირებს, მაგრამ შვილიშვილები საკუთარ ძალებს აუცილებლად მოსინჯავენ. თავად კი კურსებზე სიამოვნებით ივლის: ”ძნელია ოცდამეერთე საუკუნეში კომპიუტერის ცოდნის გარეშე რამეს მიაღწიო”.

თითოეულ სოფელში კომპიუტერულ ცენტრს ორი თანამშრომელი ეყოლება. ცენტრს უფასოდ გადაეცემა სამი კომპიუტერი და ექნება უფასო ტექნიკური მხარდაჭერა ერთი წლის განმავლობაში. თანამშრომლებს ჩაუტარდებათ ტრენინგები და კონსულტაცია ბიზნესის წარმოების, შესათავაზებელი სერვისებისა და სხვა საკითხების შესახებ.
კომპიუტერული ცენტრისთვის შერჩეული კანდიდატი ვალდებული იქნება, შერჩევის ეტაპის დასრულებამდე შეაგროვოს სოფლის მცხოვრებთა საკონტაქტო მონაცემები და გადასცეს მათ ინფორმაცია პროექტის შესახებ.

კომპიუტერული ცენტრები ადგილობრივ მოსახლეობას სხვადასხვა მომსახურებებსაც გაუწევს. ცენტრი ითანამშრომლებს კერძო სექტორთან - ბანკებთან, სადაზღვევო კომპანიებთან, ამანათის გადამზიდავ კომპანიებთან, ინტერნეტ და კავშირგაბმულობის სფეროს წარმომადგენლებთან.

კომპიუტერული ცენტრის შემოსავლის ძირითადი წყარო მომსახურებების გაწევის სანაცვლოდ მიღებული თანხა იქნება.

”მოსახლეობას ცენტრის მომსახურებისთვის მიზერული თანხის გადახდა მოუწევს”, - ამბობს სამოქალაქო რეესტრის სააგენტოს ახალციხის სამსახურის მთავარი სპეციალისტი ზაზა ზაზაძე. რაც შეეხება ცენტრის თანამშრომლების გადამზადებას,ზაზაძის თქმით შერჩეული კანდიდატები სავარაუდოდ, სამოქალაქო რეესტრის სააგენტოში გადამზადდებიან.

„კომპიუტერის ცოდნის გამავრცელებელი საზოგადოების“ წარმომადგენლები ახალციხის შემდეგ ადიგენის მუნიციპალიტეტის მოსახლეობას შეხვდნენ. კომპიუტერული ცენტრი ადიგენის მუნიციპალიტეტის ორ სოფელში: უდესა და არალში გაიხსნება.

კონკურსი 15 მაისიდან დაიწყო და მსურველებს განაცხადის შევსება 15 ივნისამდე შეუძლიათ. ინტერნეტის გარდა, რეგისტრაციის გავლა სამოქალაქო რეესტრის რეგიონულ სამსახურებშიცაა შესაძლებელი, ამისათვის კანდიდატმა სპეციალური განაცხადი უნდა შეავსოს.

[თიკო ზაზაძე, ახალციხე]