ახალციხეში სისხლის ჩაბარების აქცია დაიწყო

აქციის ორგანიზატორი თბილისის ჰემატოლოგიისა და ტრანსფუზიოლოგიის ინსტიტუტია. გაღებული სისხლი განაწილდება საქართველოს მასშტაბით არსებულ კლინიკებში, რომელსაც გადაუდებელი შემთხვევებისთვის, ონკოლოგიური და ჰემატოლოგიური დაავადებების სამკურნალოდ გამოიყენებენ. დონორებს კი ეცნობებათ სისხლის კვლევის შედეგები.

"მსგავს აქციაში უკვე მეოთხედ ვმონაწილეობ. მიხარია, რომ ჩემი გაღებული სისხლით სხვას ვეხმარები. მოვუწოდებ ყველას, მიიღონ მონაწილეობა, ჩვენი გაღებული სისხლით ადამიანების გადარჩენა შეგვიძლია", – ამბობს ელენე გოგოლაძე.

ჰემატოლოგიისა და ტრანსფუზიოლოგიის ინსტიტუტის დირექტორის მოადგილის, სისხლის ბანკის დამფუძნებლის თინა ჯანაშვილის განმარტებით მსურველებს დღის ბოლომდე შეეძლებათ მივიდნენ საკრებულოს შენობის პირველ სართულზე და სისხლი ჩააბარონ.



[ავთო ინასარიძე, ახალციხე]