თურქულ ბართან დაკავებული ახალგაზრდები პასუხისგებაში მისცეს

მათ პროკურატურამ ბრალი სისხლის სამართლის კოდექსის 239–ე მუხლით წარუდგინა, რაც ხულიგნობას გულისხმობს.

სამი დაკავებულიდან ორს, კ. ბ–სა და გ. კ–ს ბრალი 239–ე მუხლის მეორე ნაწილით ედებათ, რაც გულისხმობს ხულიგნობას წინასწარი შეთანხმებით, ჯგუფის მიერ და ისჯება ჯარიმით, ან ორიდან ხუთ წლამდე თავისუფლების აღკვეთით.

ლ. ბ–ს კი ამავე მუხლის მესამე ნაწილით გათვალისწინებული დანაშაულის ჩადენისთვის სდებენ ბრალს, რაც გულისხმობს ხულიგნობის ჩადენას ცეცხლსასროლი იარაღით ან სხვა საგნის გამოყენებით და ისჯება თავისუფლების აღკვეთით, ვადით ოთხიდან შვიდ წლამდე .

შეგახსენებთ, რომ შემთხვევა ახალციხეში, საბარგო სადგურზე მოხდა. ახალგაზრდები თურქულ ბარში ჩხუბისთვის დააკავეს. შსს–ს მიერ გავრცელებული განცხადების მიხედვით, „არაფხიზელ მდგომარეობაში მყოფი ზემოხსენებული პირები მიმდინარე წლის 9 ნოემბერს, გვიან ღამით, ახალციხეში, ე.წ. საბარგო სადგურის დასახლებაში, ერთ-ერთ თურქულ ბარში მივიდნენ. მათ ბარში მყოფ საქართველოს და თურქეთის რესპუბლიკის მოქალაქეებს, შესვლისთანავე, ჯერ სიტყვიერი, შემდეგ კი ფიზიკური შეურაცხყოფა მიაყენეს, რა დროსაც თურქეთის რესპუბლიკის ერთ-ერთმა მოქალაქემ თავის არეში დაზიანება მიიღო“.

მომხდარის გამო ბარის მეპატრონემ პოლიცია გამოიძახა. ახალგაზრდებს ადმინისტრაციული პატიმრობა ამავე ფაქტზე, პოლიციელებისთვის დაუმორჩილებლობის გამო აქვთ შეფარდებული.

[თამუნა უჩიძე, ახალციხე]