შვეიცარიის დელეგაციამ ახალციხეში სურსათის სააგენტოს ლაბორატორია დაათვალიერა

შვეიცარიის განვითარებისა და თანამშრომლობის სააგენტოს წარმომადგენლები ახალციხეს, გაეროს სურსათისა და სოფლის მეურნეობის ორგანიზაციასთან (FAO-სთან) ერთად დღეს, სამ მაისს ესტუმრნენ. მათი თქმით, ისეთი საზღვრისპირა რეგიონისთვის, როგორიც სამცხე–ჯავახეთია სურსათის ეროვნული სააგენტოს გამართულ მუშაობას, ცხოველების დაავადებების კონტროლის თვალსაზრისით განსაკუთრებული მნიშვნელობა ენიჭება. ამ თვალსაზრისით, სტუმრებმა ყურადღება საქართველოში მიმდინარე "ცხოველთა იდენტიფიკაცია–რეგისტრაციის პროგრამაზეც"(NAITS) გაამახვილეს.

"საქართველოში მოსახლეობის 50% სოფლად ცხოვრობს და მათ საქონელი ჰყავთ. ეს პროგრამა ეხმარება მათ რომ ჯანსაღი საკვები მიიღონ, დაიცვან სტანდარტები და პროდუქტი ექსპორტზეც გაიტანონ. ამიტომაა საჭიროა ლაბორატორიაც. იქ, როგორც ფერმერი, ასევე მთავრობა დააკვირდება თუ რამდენად ჯანმრთელია ცხოველი, როგორ მიმდინარეობს მისი მკურნალობის პროცესი და რას აჭმევენ მას", – ამბობს შვეიცარიის განვითარებისა და თანამშრომლობის გენერალური დირექტორი მანუელ ზაგერი.

"ცხოველთა იდენტიფიკაცია–რეგისტრაციის პროგრამის" ხელმძღვანელი მიხეილ სოხაძე აქცენტს პროექტის შედეგებსა და მიზნებზე აკეთებს: "პირველ რიგში, პროექტის მიზანი ცხოველთა და ადამიანთა ჯანმრთელობაა. თანმდევი პროცესი კი ქვეყნისთვის დადებითი იმიჯი და ხორცპროდუქტების ექსპორტის ზრდა. შედეგებს რაც შეეხება, ხორცპროდუქტების ექსპორტი, ბოლო წლებთან შედარებით, ექვსჯერ გაიზარდა. ამჟამად, მილიონზე მეტი ცხოველია იდენტიფიცირებული და მათი რაოდენობა კიდევ იზრდება".

პროექტს გაეროს სურსათისა და სოფლის მეურნეობის ორგანიზაცია (FAO) სურსათის ეროვნულ სააგენტოსთან ერთად, შვეიცარიისა და ავსტრიის განვითარების სააგენტოების ფინანსური მხარდაჭერით ახორციელებს.



[ავთო ინასარიძე, ახალციხე]