ახალციხეში, 9 აპრილის ქუჩაზე მანქანა დაიწვა

ცხრა აპრილის ქუჩაზე მცხოვრები აშოტ ბანგოიანის მანქანას ცეცხლი, კორპუსის წინ ეზოში, დაახლოებით, 03:30 საათზე გაუჩნდა. ბანგოიანთან დაკავშირება ვერ შევძელით, ის „სამხრეთის კარიბჭეს“ არც სახლში დახვდა. როგორც მის მეზობლად მცხოვრებლები ამბობენ, მანქანის წინა მხარე მთლიანად დაიწვა: „საშიშროება იყო, რომ ცეცხლი სხვა მანქანებზეც გადასულიყო, მაგრამ მალევე ჩააქრეს. მერე მანქანა ექსპერტიზის ჩასატარებლად წაიღეს“.

რა შეიძლება გამხდარიყო ცეცხლის გაჩენის მიზეზი უცნობია.

„ეს ოჯახი ახალი გადმოსულია ამ კორპუსში, არ ვიცით რა მოხდა“, – ამბობენ ცხრა აპრილის ქუჩაზე მცხოვრებლები.

მომხდარს შინაგან საქმეთა სამინისტრო 187–ე მუხლით იძიებს, რაც ნივთის დაზიანებას ან განადგურებას გულისხმობს.

[თინათინ ზაზაძე, ახალციხე]