საკირეში მცხოვრებლები: ‘ტყეში ცეცხლი დაუდევრობით გაჩნდებოდა’

საკირეში მცხოვრებლები ამბობენ, რომ ტყეში სანადიროდ, ასევე, სოკოსა და კევის შესაგროვებლად ხშირად დადიან.

„ჯერ ისევ ცივა, შესაძლოა, ვინმემ გასათბობად ცეცხლი დაანთო, მერე კარგად აღარ ჩააქრო და ხანძარი გაჩნდა“, – ამბობს ადგილობრივი იოსებ გოგოლაძე.

დაუდევრობაზე საუბრობენ, მის მეზობლად მცხოვრები სიმონ სამსონიძე და რეზო შალუტაშვილიც: „მანდ ცეცხლს ძალით არავინ გააჩენდა, შეიძლება, ვიღაცამ სიგარეტი გადააგდო“.

ადგილობრივების ნაწილი ფიქრობს, რომ შესაძლოა ცეცხლი ტყეში თავისითაც გაჩნდა.

„იმდენად მიუვალი ადგილია, შეუძლებელია მანდ ვინმე მისულიყო. ალბათ სადმე ბოთლის, შუშის ნატეხი ეგდო და იქიდან აალდა“, – ამბობს ანეტა შაყულაშვილი.

ხანძრის გაჩენის მიზეზს შინაგან საქმეთა სამინისტრო იძიებს. უწყებამ ძიება ცეცხლის წაკიდებით ნივთის დაზიანების მუხლით დაიწყო.
საკირეს ტყეში ხანძარი ამ დროისთვის ლოკალიზებულია. ტყეში ცეცხლი, გუშინ 30 აპრილს, დაახლოებით, 19:00 საათზე, სოფლიდან შვიდი კილომეტრის მოშორებით გაჩნდა.

ამ დროისთვის, ტყეში ხანძარი ლოკალიზებულია.

[sknews.ge]