გაგრძელდება თუ არა ახალციხეში სასტუმრო ’ტბის’ მშენებლობა

ახალქალაქის გზატკეცილზე სასტუმროს ორი სართული მაშინ აშენდა, როცა ქალაქში მშენებლობების ბუმი დაიწყო. გასულ წელს, არჩევნებამდე ინვესტორი აქ შვიდსართულიან სასტუმროს აშენებდა.

”მშენებლობა რატომ შეჩერდა არ ვიცით, ეს კერძო ინვესტიციაა და არ გვაქვს უფლება მშენებლობის დასრულების ვადის ამოწურვამდე რაიმეში ჩავერიოთ”, - ამბობს ახალციხის მუნიციპალიტეტის გამგეობის ეკონომიკისა და ინფრასტრუქტურის განვითარების სამსახურის უფროსი თენგიზ ზედგინიძე.

მშენებელ კომპანიას მშენებლობის ნებართვა 2013 წლის 30 დეკემბრამდე აქვს.

’ჯერ ჩვენ ვერანაირ რეაგირებას ვერ მოვახდენთ. ის თუ რამდენად ჩაეტევიან გაწერილ ვადებში ეგ სხვა საკითხია. თუ ვერ მოასწრებენ ალბათ შეგვეხმიანებიან, თუ არადა ჩვენ გავუგზავნით წერილს და ვკითხავთ, რას აპირებენ გაგრძელდება თუ არა მშენებლობა. ასე მიტოვება უხერხულია’, - აცხადებს ზედგინიძე.

მისი თქმით, არ არის გამორიცხული მშენებელი კომპანიის წარმომადგენლებმა პროექტში ცვლილების შეტანა მოითხოვონ.

’თუ იმ სახით აპირებენ მშენებლობის დასრულებას, როგორც ეს პრეოქტითაა წარმოდგენილი ალბათ მშენებლობის ნებართვის გაგრძელებას მოითხოვენ, ან მშენებლობის კონსერვაცია მოხდება’, - ამბობს ზედგინიძე.

სასტუმრო 5 550 კვ.მ ფართობზე შენდება და მასში 70 ოთახი განთავსდება.

იმის გასარკვევად, თუ რატომ შეჩერდა მშენებლობა და იგეგმება თუ არა კვლავ სასტუმროს სამუშაოს განახლება ”სამხრეთის კარიბჭე” მშენებლ კომპანიას ”EBM GENERAL”- ს დაუკავშირდა. როგორც აღნიშნულ კომპანიაში დაგვპირდნენ ”სამხრეთის კარიბჭის” კითხვებს ხვალ უპასუხებენ.

[ნუკა სტეფნაძე, ახალციხე]