ზაფხულიდან აბასთუმანში სასტუმროს მშენებლობა დაიწყება

"რედიქსის" ხელმძღვანელი ლაშა პაპაშვილი აცხადებს, რომ სასტუმროს პროექტი უკვ დამტკიცებულია. სასტუმრო 140-ნომრიანი იქნება და მასში ინვესტიციის სახით 32 მილიონი დოლარი ჩაიდება.პაპაშვილი აცხადებს, რომ ჯერჯერობით არ არის მიღებული გადაწყვეტილება შევა თუ არა სასტუმროს მართვაში რომელიმე საერთაშრისო ბრენდი.

პროექტის მიხედვით 4-ვარსკვლავიანი სასტუმრო დაბა აბასთუმანში, აღობილის დასახლებაში აშენდება. სასტუმრო მოიცავს კაფე-რესტორანს, საკონფერენციო დარბაზს, შეხვედრების ოთახს, აუზს, ბარსა და კლუბს, ფიტნესკლუბსა და სპას.

ლაშა პაპაშვილმა აბასთუმანში სასტუმროს მშენებლობის ვალდებულება 2009 წელს აიღო, თუმცა, საინვესტიციო ვალდებულებები ვერ შეასრულა. 2014 წელს მთავრობის განკარგულებით ბიზნესმენი საინვესტიციო ვალდებულებების შეუსრულებლობისთვის დაკისრებული პირგასამტეხლოსგან გათავისუფლდა. მოგვიანებით პროექტში საპარტნიორო ფონდი შევიდა.

სააქციო საზოგადოება საპარტნიორო ფონდი საქართველოს მთავრობამ 2011 წელს დააარსა. სახელმწიფო ფლობს ფონდის 100 პროცენტს. საპარტნიორო ფონდის აქტივები 5 მილიარდ ლარს აჭარბებს. ფონდის საკუთრებაშია „საქართველოს რკინიგზის“, „საქართველოს ნავთობისა და გაზის კორპორაციის“, „საქართველოს სახელმწიფო ელექტროსისტემის“, ელექტროსისტემების კომერციული ოპერატორისა“ და ნაწილობრივ „თელასის“ აქციები.

ამჟამად, საპარტნიორო ფონდის დირექტორი საპარლამენტო უმრავლესობის ყოფილი ლიდერია. რაც შეეხება რედიქს ჯგუფს, კომპანია საქართველოს უძრავი ქონების ბაზარზე 2007 წლიდან არის. 2008 წლიდან კომპანია ახალი, განსხვავებული ფუნქციური დანიშნულების ობიექტების მართვასა და განვითარებას ითავსებს.

[sknews.ge]