‘ახალციხის ციხეზე’ სეზონის გახსნამდე დაზიანებულ კედლებს ვერ შეაკეთებენ

„ახალციხის ციხის“ ციტადელის კოშკზე, საკონფერენციო დარბაზსა და იმ შენობების, ნაწილში, რომლებშიც მაღაზიები იყო განთავსებული, წვიმის დროს წყალი ჩამოდის.

„საკონფერენციო დარბაზის სახურავზე ჯერ ვერ მივაგენით იმ ადგილს, საიდანაც წყალი ჟონავს, რომ შესაბამისი მასალით შევაკეთოთ. რაც შეეხება კოშკს იქ მინებს ჩავსვამთ, რომ წყალი აღარ ჩავიდეს. ამ ყველაფრის კაპიტალურ რემონტს 26 მაისის ღონისძიებებისთვის მოვასწრებთ. მერე, ასევე, შევათეთრებთ კედლებსაც“, – გვითხრეს "ახალციხის ციხის" ადმინისტრაციაში.

22 აპრილამდე, ციხის ადმინისტრაცია, დაზიანებულ კედლებს ვერ შეაკეთებს, თუმცა, ციტადელსა და კომპლექსის შესასვლელში მოაჯირების ნაწილის უკვე შეღებეს, ასევე, ტურიზმის საინფორმაციო ცენტრი და საპირფარეშოების გაარემონტეს.

„მომავალი წლიდან ციტადელისკენ მიმავალა ბილიკზე გაბიონების დამონტაჟებასაც ვგეგმავთ. ძალიან ვიწრო ბილიკია, ამიტომ როცა ბევრი ტურისტია მწვანე საფარზე გადადიან“, – აცხადებს "ახალციხის ციხის" დირექტორი დავით ტაბატაძე.

ახალციხის ციხე, ახალ ტურისტულ სეზონს კვირას, 22 აპრილს საზეიმოდ გახსნის. 16:00 საათზე ახალციხისა და ტაო–კლარჯეთის მიტროპოლიტი მეუფე თეოდორე ციხეს ტერიტორიას აკურთხებს, 17:00 საათზე კი ადგილობრივი ანსამბლების შესრულებით კონცერტი გაიმართება. ღონისძიებას ადგილობრივი თივთმმართველობის, სამხარეო ადმინსიტრაციისა და ტურიზმის დეპარტამენტის თანამშრომლები დაესწრებიან.

კომპლექსი დამთვალიერებლებს ყოველ დღე, 09:00 საათიდან 19:00 საათამდე მიიღებს.



[ლუბა გიორგაძე, ახალციხე]