ახალციხის უნივერსიტეტი 700 სტუდენტს მიიღებს

საბაკალავრო პროგრამებზე უნივერსიტეტი 700 სტუდენტს მიიღებს, 135 ადგილია პროფესიული პროგრამებისთვის, მაგისტრატურაში სწავლას კი 100 სტუდენტი შეძლებს.

უნივერსიტეტის რექტორის თინა გელაშვილის განცხადებით, წელს პირველი შემთხვევაა, როცა ინჟინერიის, აგრარულ და საბუნებისმეტყველო მეცნიერებათა ფაკულტეტზე მოთხოვნა გაიზარდა: “პირველადი დასახელებით 60 პროცენტზე მეტი განაცხადია შემოტანილი. სტუდენტების ზუსტი რაოდენობა მას მერე გახდება ცნობილი, როცა საატესტატო და ეროვნული გამოცდები დასრულდება”.

ახალციხის სახელმწიფო სასწავლო უნივერსიტეტის რექტორის მოადგილის ნიკოლოზ ახალკაცის თქმით, მოთხოვნა გაიზარდა ეკოლოგიისა და აგრო-ტექნოლოგიის მიმართულებებზეც: “ეკოლოგიის ფაკულტეტზე გამოცხადებული 40 ვაკანტური ადგილიდან, პირველადი დასახელებით 26 აბიტურიენტია დარეგისტრირებული”.

ამ ეტაპზე ახალციხის სახელმწიფო სასაწვლო უნივერსიტეტში ოთხი ფაკულტეტია. განათლების, ჰუმანიტარულ და სოციალურ მეცნიერებათა; ბიზნესის ადმინისტრირება; იურიდიული და ინჟინერიის, აგრარულ და საბუნებისმეტყველო მეცნიერებათა ფაკულტეტები. მომავალი სასწავლო წლიდან აღნიშნულ ფაკულტეტებს ორი, მედიცინის და ტურიზმის ფაკულტეტი დაემატება.

თინა გელაშვილის თქმით, აღნიშნული ფაკულტეტების დამატება რეგიონში კულტურული ძეგლების რეაბილიტაციის დაწყების შემდეგ გადაწყვიტეს: “რეგიონის განვითარების სტრატეგიიდან გამომდინარე, გიდებსა და სხვა, მსგავსი მიმართულებით გადამზადებულ კადრებზე მოთხოვნა გაჩნდება და ჩვენს სტუდენტებს დასაქმების დიდი შანსი ექნებათ”.

[მანანა სარაშვილი, ახალციხე]