გამოკითხვა: რას ფიქრობთ გედევან ფოფხაძის უმრავლესობიდან გასვლაზე?

ასპინძა–ბორჯომის მაჟორიტარი დეპუტატი გედევან ფოფხაძე აცხადებს, რომ საპარლამენტო უმრავლესობას ტოვებს.

დეპუტატმა ეს გადაწყვეტილება, მას შემდეგ მიიღო, რაც პარლამენტმა საზოგადოებრივი მაუწყებლის ბორდში ჟურნალისტ ნინია კაკაბაძის არჩევას მხარი დაუჭირა: „ეს არის ყველა მართლმადიდებლის სულში ჩაფურთხება. იმიტომ, რომ პატრიარქის მაგინებელი ქალბატონი არ უნდა იღებდეს პარლამენტში ხმებს არასდროს", – ამბობს ფოფხაძე.

გედევან ფოფხაძის ეს განცხადება, უმრავლესობის წევრების ნაწილმა „რელიგიური სპეკულირების ფონზე პარტიისთვის მძიმე შეურაცხყოფად“ მიიჩნია. საქართველოს პრემიერ მინისტრმა, გიორგი კვირიკაშვილმა კი განაცხადა, რომ მან მაჟორიტარს უმრავლესობაში დარჩენა სთხოვა: „ძალიან დამწყდება გული, თუ გედი ფოფხაძე დატოვებს უმრავლესობას. მე მას შევხვდი და ვთხოვე, არ დაეტოვებინა უმრავლესობა და იმედი მაქვს, არ დატოვებს“.

გედევან ფოფხაძეს უმრავლესობის დატოვებასთან დაკავშირებული პროცედურები, აღდგომის შემდეგ, სავარაუდოდ, დღეიდან, 10 აპრილიდან უნდა დაეწყო, თუმცა მიმართა თუ არა მან მმართველ გუნს ოფიციალური განცხადებით, უცნობია. ფოფხაძემ დღეს „სამხრეთის კარიბჭის“ სატელეფონო ზარებს არ უპასუხა.



[ავტორი: ლუბა გიორგაძე
ვიდეო: ნანა ინასარიძე]