მესხი დეპუტატები პარლამენტში გენდერულ კვოტირებას მხარს არ უჭერენ

პარლამენტის პლენარულ სხდომაზე, პირველი მოსმენისას სავალდებულო გენდერული კვოტირების შესახებ კანონპორექტს ახალციხე–ადიგენის მაჟორიტარმა დეპუტატმა გიორგი კოპაძემ და ასპინძა–ბორჯომის მაჟორიტარმა დეპუტატმა გედევან ფოფხაძემ მხარი არ დაუჭირეს.

კოპაძე მიიჩნევს, რომ გენდერული კვოტირების შესახებ კანონის მიღება ქალებისთვის შეურაცხმყოფელი იქნება: „მგონია, რომ ქალები კვოტირების გარეშეც შეუზღუდავები არიან. ამის მაგალიათია ამ მოწვევის პარლამენტი, სადაც ქალებიც წამყვან პოზიციებზე არიან. ამიტომ ხელოვნურად რაღაცეების დაწესება ჩემთვის მიუღებელია“.

კოპაძის მოსაზრებას იზიარებს გედევან ფოფხაძეც. მისი თქმით, კანდიდატები ღირსებისა და პროფესიონალიზმის გათვალისწინებით უნდა შეირჩენენ და არა სქესის: „ნებისმიერი კვოტირება პოლიტიკურ ცხოვრებაში მიუღებელია. როდესაც შენ კვოტებით ავსებ პარლამენტს, გავიწყდება ის ძირითადი პრინციპები, რითაც უნდა მოხდეს პროფესიონალი კადრის შერჩევა. იმ ქალისთვისაც არ არის სწორი გზავნილი, ვისაც ეუბნები, რომ შენ ბევრი უნდა იყო პარლამენტში, ამისთვის კი გიწესებ კვოტას“.

არ იზიარებენ ფოფხაძისა და კოპაძის პოზიციებს პარლამენტარი ქალები: „ქალისთვის ის უფრო შეურაცხმყოფელია, რომ წამყვან თანამდებობებზე მათი ადგილი არ არის. აღმოჩნდა, რომ პარტიები ვერ ხედავენ იმის საჭიროებას, რომ სიებში ქალები ჰყავდეთ, ამიტომ გადაწყდა საკანონმდებლო დონეზე დაგვერეგულირებინა“, – ამბობს ირინა ფრუიძე.

ამ ეტაპზე სამცხე–ჯავახეთში, არც საკრებულოს თავმჯდომარის ან მისი მოადგილის და არც მერის მოადგილის პოზიციაზე, არცერთი ქალი მუშაობს.

მიუხედავად იმისა, რომ გასულ წლებთან შედარებით, სამცხე–ჯავახეთში არჩეული ქალების რაოდენობა, 2017 წლის აჩევნებისათვის, 9%–იდან 12%–მდე გაიზარდა, წამყვან თანამდებობებზე მათი როლი მაინც დაბალია. რეგიონში თვითმმართველობის არჩევნებზე ადგილობრივებმა ერთი ქალი მერი და 23 ქალი დეპუტატი აირჩიეს. ნინოწმინდის მერი, ანივარდ მოსოიანი არამხოლოდ სამცხე–ჯავახეთის, საქართველოს მასშტაბით, თვითმმართველობის არჩევნებში გამარჯვებული ერთადერთი ქალი მერია.

რას ფიქრობს გენდერულ კვოტირებასთან დაკავშირებით ნინოწმინდა–ახალქალაქის მაჟორიტარი დეპუტატი ენზელ მკოიანი უცნობია. იგი იმ სხდომას, რომელზეც კვოტირების შესახებ კანონპროექტი ჩავარდა, არ დასწრებია. „სამხრეთის კარიბჭეს“ სატელეფონო ზარებს კი არ უპასუხა.

[ლუბა გიორგაძე, ახალციხე]