როდის აღდგება მოძრაობა სრულად 9 აპრილის ხიდზე [Photo]

ერთი კვირაა ხიდის ერთი მხარე ამკრძალავი ლენტითაა შემოსაზღვრული. საგზაო ნიშნები მძღოლებს სარემონტო სამუშაოების შესახებ აფრთხილებს. ეს ხიდი ქალაქის ცენტრში მოსახვედრი ორი მიმართულებიდან ერთ–ერთია, ამიტომ, აქ დატვირთული მოძრაობაა და ამ შეზღუდვის გამო ხანმოკლე საცობები იქმნება.

ხიდის შეკეთება მას შემდეგ გადაწყდა, რაც მის ზედაპირზე, რამდენიმე ადგილას, ასფალტის საფარი გაიბზარა. გაბზარული ადგილების ამოჭრის შედეგად აღმოჩნდა, რომ გადაბმის ადგილებში ხიდს კომპენსატორები არ აქვს.



„კომპენსატორები სჭირდება იმისთვის, რომ ასფალტში ჩასული წვიმის წყალი ჩავიდეს მდინარეში და ბურჯებში არ გაიჟღინთოს. ახლა ასეთი რამ არ აქვს“, – გვიხსნის ხიდის შემკეთებელი კომპანიის, „გზა და ხიდის“ ხელმძღვანელი გოდერძი ბლუაშვილი.

მისი განმარტებით, მას შემდეგ, რაც ერთ მხარეს სამუშაოები მორჩება, ხიდის მეორე მხარეს გადაინაცვლებენ. ასე იმიტომ გადაწყდა, რომ მთლიანი ხიდი არ ჩაეკეტათ. კომპანია სამუშაოების დასრულებას 7–8 დღის ვადაში ვარაუდობს. მას შემდეგ, რაც კომპენსატრების მონტაჟი დასრულდება, გზის ამ მონაკვეთზე ასფალტის საფარსაც შეცვლიან. თუმცა, ამას უკვე სხვა კომპანია გააკეთებს.



ხიდზე სამუშაოები საავტომობილო გზების დეპარტამენტის დაკვეთით მიმდინარეობს. „გზა და ხიდი“ შპს „არილის“ ქვეკონტრაქტორია. ამ კომპანიას აქვს მოგებული აღმოსავლეთ საქართველოში ხიდების მოვლა–შენახვის ტენდერი.



[ნინო ნარიმანიშვილი, ახალციხე]