ლევან დავითაშვილი: კარტოფილის იმპორტის რამდენიმე თვით აკრძალვა დროებითი სანიტარული ღონისძიებაა

მთავარი → სიახლე, ეკონომიკა, საზოგადოება 20.03.2018

საქართველოს გარემოს დაცვისა და სოფლის მეურნეობის მინისტრის ლევან დავითაშვილის განმარტებით, თურქეთიდან კარტოფილის იმპორტის რამდენიმე თვით აკრძალვა დროებითი, სანიტარული ღონისძიებაა.

ლევან დავითაშვილი: კარტოფილის იმპორტის რამდენიმე თვით აკრძალვა დროებითი სანიტარული ღონისძიებაა

მინისტრის განცხადებით, ეს თესვის სეზონს უკავშირდება.

"ქვეყანაში არ უნდა შემოდიოდეს მნიშვნელოვანი დაავადებები, რომლებიც შეიძლება იყოს დამაზიანებელი. ეს არის დროებითი ზომა ფერმერების დასაცავად. საკმარისი კარტოფილი მივიღეთ შარშან და წელს, საქართველოში წარმოება იზრდება. არ შეგვიზღუდავს იმპორტი, ბაზარი თავისუფალია, რაც დაარეგულირებს ბაზარს და მოსახლეობას არ ექნება შეშფოთების საფუძველი. ეს არ არის პროტექციისთვის გადადგმული დროებითი შეზღუდვა, ეს არის მცენარეთა დაცვა“, - აღნიშნა დავითაშვილმა.

შეგახსენებთ, რომ საქართველოს მთავრობის გადაწყვეტილებით, პირველ ივნისამდე, თურქეთიდან საქართველოში კარტოფილის შემოტანა აიკრძალა. სურსათის ეროვნულ სააგენტოში 'სამხრეთის კარიბჭეს' განუცხადეს, რომ ეს დროებითი, პრევენციული ღონისძიებაა, იმისთვის, რომ თურქეთიდან სასურსათო მიზნით შემოტანილი კარტოფილი, სათესლე მასალად არ გამოიყენონ.

კარტოფილის კიბო, რომლის გამომწვევია სოკო Synchytrium endobioticum Pers, კარტოფილის ყველაზე მძიმე დაავადებად ითვლება. ავადდება მცენარის ყველა ორგანო: ტუბერები, სტოლონები, ფესვის ყელი, იშვიათად, დაავადების ძლიერი განვითარებისას ღერო, ფოთლები და ყვავილებიც კი. სოკო ასნებოვნებს მასპინძლის მხოლოდ ახალგაზრდა, მოზარდ ქსოვილებს.

[sknews.ge]