საკრებულოებთან გენდერული თანასწორობის საბჭოები იქმნება

ბორჯომისა და ასპინძის მუნიციპალიტეტების საკრებულოებში გენდერული თანასწორობის საბჭოები უკვე შექმნეს, ახალციხესა და ადიგენში ჯერ მხოლოდ დებულებები დაამტკიცეს, ახალქალაქსა და ნინოწმინდაში კი დებულებაზე მუშაობას უახლოეს დღეებში დაიწყებენ.

საბჭოების შექმნის შესახებ რეკომენდაცია საკრებულოებმა მთავრობიდან მიიღეს. დებულებების მიხედვით, საბჭოების შექმნის მიზანი, მუნიციპალიტეტებში გენდერული თანასწორობის დაცვაა. საბჭოებმა გენდერულ ჭრილში უნდა გაანალიზონ თვითმმართველობის მიერ განხორციელებული პროექტები და აქტივობები, ასევე მუნიციპალიტეტების მიერ გამოცემული სამართლებრივი აქტები. მათ უნდა მოამზადონ გენდერული თანასწორობის დაცვის უზრუნველსაყოფად რეკომენდაციებიც.

საბჭოს წევრთა მინიმალური ოდენობა შვიდი–ცხრა წევრია. წევრები საკრებულოს დეპუტატები, ასევე მერიებში გენდერის განყოფილებაში დასაქმებულები, ან გენდერის საკითხებზე პასუხისმგებელი პირები არიან. საბჭოს შეუძლია წევრებად მიიწვიოს აღნიშნულ საკითხებზე მომუშავე არასამთავრობო ორგანიზაციის წარმომადგენლები და ექსპერტები. საბჭო ანაზღაურების გარეშე იმუშავებს.

შეკითხვაზე – რამდენად ექნებათ საბჭოების წევრებს შესაბამისი ცონდა ამ მიმართულებით, საკრებულოებში ამბობენ, რომ საბჭოს იმ კადრებით დააკომპლექტებენ, ვინც „მსგავს საკითხებთან ახლოს დგას“, იმედს არასამთავრობო ორგანიზაციებზე ამყარებენ: „გარდა ამისა, საბჭოების მუშაობაში ჩავრთათ დეპუტატ ქალებს, ქალმა ქალის საჭიროებები ყველაზე უკეთ იცის“.

ასპინძაში, ახალციხესა და ადიგენში საბჭოებს საკრებულოს თავმჯდომარეები უხელმძღვანელებენ, ბორჯომში კი თავმჯდომარის მოადგილე.

ასპინძაში საბჭოში 11 წევრია, მათგან 60% ქალი. ამ საბჭოს წევრია ორგანიზაცია „დემოკრატ ქალთა საზოგადოების“ თავმჯდომარე მარინა მოდებაძე, ასევე სოფელ ტოლოშის სათემო ორგანიზაციის თავმჯდომარე ნინელი ბერიძე და ასპინძაში ქალთა ოთახის ხელმძღვანელი მედეა ქავთარაძე.

„ჩვენი მიზანია ბიუჯეტში ცალკე მუხლად გაიწეროს ქალთა საჭიროებებისთვის თანხა. ასევე გვინდა, რომ სოფლებიდან სამარშრუტო ტაქსებმა იარონ ბავშვების ბაღში სატარებლად. გარდა ამისა, დეპუტატებს დავავალებთ ყველა სოფელში აქტიური ქალების შესახებ ინფორმაციის მოძიებას და ვეცდებით თუნდაც მესამე სექტორში მათ დასაქმებაში დავეხმაროთ“, – ამბობს ასპინძის მუნიციპალიტეტის საკრებულოს აპარატის უფროსი და გენდერის საბჭოს წევრი დარეჯან ზღუდაძე.

19 წევრით დააკომპლექტა ბორჯომმა გენდერის საბჭო. მასში 12 ქალი და შვიდი კაცია.

„ჯერ სამოქმედო გეგმა გაწერილი არ გვაქვს, ახლა ვმუშაობთ“, – ამბობს ბორჯომის მუნიციპალიტეტის საკრებულოს თავმჯდომარის მოადგილე გიორგი გოგიჩაიშვილი, რომელიც გენდერის საბჭოს ხელმძღვანელობს.

ადიგენის მუნიციპალიტეტში საბჭოს დებულება უკვე დაამტკიცეს და მის შემადგენლობას თვის ბოლომდე განსაზღვრავენ.

„ალბათ 15 წევრი იქნება საბჭოში. ისეთ არასამთავრობო ორგანიზაციებთან, რომლებიც გენდერის საკითხებზე მუშაობენ, მოწვევები გაგზავნილი გვაქვს და პასუხებს ველოდებით. თვის ბოლოს ვვარაუდობთ, რომ საბჭოს ჩამოვაყალიბებთ“, – ამბობს ადიგენის მუნიციპალიტეტის საკრებულოს თავმჯდომარე იმედა მღებრიშვილი.

ახალციხის მუნიციპალიტეტმაც ჯერ მხოლოდ დებულება დაამტკიცა: „კონსულტაციები უნდა გავიაროთ არასამთავრობო ორგანიზაციებთან მის ჩამოყალიბებასთან დაკავშირებით. მოლაპარაკებებს ვაწარმოებთ ახლა. ამ დროისთვის ზუსტად არ ვიცით საბჭოს რამდენი წევრისგან დავაკომპლექტებთ“.

[თამუნა უჩიძე, ახალციხე]