მდინარე ფოცხოვში ჩავარდნილი ბიჭი საავადმყოფოდან გაწერეს

როგორც ახალციხის რეფერალურ საავადმყოფოში აცხადებენ, მოზარდის მდგომარეობა სტაბილური იყო და გუშინ, 14 თებერვალს, გვიან ღამით, გაწერეს.

მეორეკლასელი ბიჭი მდინარე ფოცხოვში, გუშინ, 14 თებერვალს ჩავარდა. როგორც "სამხრეთის კარიბჭეს" თვითმხილველებმა უთხრეს, იგი მეგობართან ერთად სანაპიროს ქუჩაზე არსებულ სტადიონზე თამაშობდა, ბურთი წყალში ჩაუვარდა და თვითონაც გადაყვა. დინებამ ბავშვი დაახლოებით 200 მეტრის მანძილზე გაიტაცა. იგი მესამე საბავშვო–ბაღის დარაჯმა გადაარჩინა – მამაკაცმა მოზარდის ამოყვანა თამარაშვილის ქუჩაზე, ხიდის მიმდებარე ტერიტორიაზე შეძლო.

დაშავებული საავადმყოფოში გადაიყვანეს, მას სხეულის გადაცივება ჰქონდა.

„ზოგადი მდგომარეობა შემოყვანისას მძიმე იყო. უტარდება ინფუზიური თერაპია სხვადასხვა მედიკამენტებით. ხვალ დილამდე დავაკვირდებით და მდგომარეობის შესაბამისად ვიმოქმედებთ“, – გვითხრეს გუშინ საავადმყოფოში.

საქართველოს შინაგან საქმეთა სამინისტროში "სამხრეთის კარიბჭეს" განუცხადეს, რომ მომხდარში დანაშაულის ნიშნები არ იკვეთება და შესაბამისად, საქმეზე ძიება არ დაწყებულა.

[sknews.ge]