ვალეში „ბერიკაობა“ გამართეს[Photo]

11 თებერვალს, დიდმარხვის წინა კვირას ვალეში მცხოვრებლები ტრადიციულად შოთა ხითარიშვილის ოჯახში დილის 09:00 საათიდან შეიკრიბნენ. სპეციალური სამოსი წლებია სწორედ ამ ოჯახში ინახება.

„სულ აქ მოდიან, იცვამენ, იღებებიან და მიდიან. წარმოდგენის დამთავრების შემდეგ კი ეს ტანსაცმელი ისევ ჩვენთან მოაქვთ, ვრცხავ და ვინახავ“, – ამბობს ოჯახის დიასახლისი ეთერ სამარჯევი.

ადგილობრივები ერთმანეთს მოსამართლის, მცველების, პატარძლის, ყადის და მისი გამრთობების ფორმების ჩაცმაში ეხმარებიან. მათ გრიმს ვალის კულტურის სახლის დირექტორი გოჩა დემეტრაძე უკეთებს: „წარმოდგენა წინასწარ ზუსტად გაწერილი და დადგმული არაა, მთელი დღის განმვლობაში იმპროვიზაციულად ითამაშებენ“.

ადგილობრივები თამაშში ბატონყომობის გადავარდნის, სოფლიდან ყადის მოშორების სცენას წარმოადგენენ.

„ამ ყველაფერში გარდა მონაწილეებისა ხალხიც ერთვება, ცეკვითა და გართობით უნდა შეუქციონ ყადს თავი რომ მას ბოლოს,თავზე ლაფი დაასხან, ვირზე უკუღმა დასვან და სოფლიდან გააძევონ“, – ამბობს მოსამართლის როლის შემსრულებელი ანზორ თელიაშვილი.

ადგილობრივებს სჯერათ, რომ იმ წელს, როცა "ბერიკაობა" გაიმართება სოფელი ბევრ მოსავალს მიიღებს: "სიკვდილიანობა ნაკლები გვექნება, ნაყოფიერი წელი იქნება".





































ტერმინი "ბერიკაობა" განაყოფიერებისა და შვილიერების კულტის სადიდებელ სანახაობას აღნიშნავს და ნაწარმოებია საერთო ქართველური ძირიდან „ბერ“ (შვილი). ის შეიცავს ქართველი ხალხის დამპყრობლისადმი წინააღმდეგობის, ასევე, ავადების, ეკლესიის მსახურთა, მოსამართლეთა საქმიანობის მამხილებელ სცენებს. "ბერიკაობა" სათავეს მე–17 საუკუნიდან იღებს.

[თამუნა უჩიძე, ახალციხე]