ადიგენში „ბერიკაობისთვის“ ემზადებიან

ადგილობრივმა თვითმმართველობამ ტენდერი 1 525 ლარზე 27 თებერვალს გამოაცხადა. მსურველებს ტენდერში მონაწილეობა 3 მარტიდან შეეძლებათ.

სოფელ არალში ღონისძიება 16–დან 19 მარტამდე გაიმართება.

სამი დღის განმავლობაში არალში მოეწყობა შეჯიბრება ჭიდაობაში. მეოთხე დღეს, 19 მარტს გაიმართება კოსტუმირებული წარმოდგენა „ბერიკაობა“, რომელშიც მონაწილეობას ადგილობრივი ახალგაზრდები მიიღებენ.

პირველ ადგილზე გასულ სპორტსმენებს საჩუქრად თანხა გადაეცემათ, დანარჩენებს კი ფასიანი საჩუქრები და მედლები.

აბსოლიტურ წონით კატეგორიაში: პირველი ადგილი -100 ლარი, მეორე ადგილი 70 ლარი, მესამე ადგილი 50 ლარი;

I ადგილზე გასული მოჭიდავეებისათვის (30,35,40,45,50,55,60,65,70 კგ წონით კატეგორიებში) - ელექტრო ჩაიდანი;

II ადგილზე გასული მოჭიდავეებისათვის (30,35,40,45,50,55,60,65,70 კგ წონით კატეგორიებში) - კედლის საათი;

III ადგილზე გასული მოჭიდავეებისათვის (30,35,40,45,50,55,60,65,70 კგ წონით კატეგორიებში ) - წვენის ჭიქები კომპლექტში 6 ცალი;

ტერმინი ბერიკაობა განაყოფიერებისა და შვილიერების კულტის სადიდებელ სანახაობას აღნიშნავს და ნაწარმოებია საერთო ქართველური ძირიდან „ბერ“ (შვილი). ბერიკაობაში სხვადასხვა ფორმებში გადაცმული ბერიკები მონაწილეობენ. სცენარი შეიცავს ქართველი ხალხის დამპყრობლისადმი წინააღმდეგობის, ასევე, ავადების, ეკლესიის მსახურთა, მოსამართლეთა საქმიანობის მამხილებელ სცენებს.

ბერიკაობის დროს, ერთს ბერიკად რთავენ (ტანზე გადმობრუნებულ ქურქს აცმევენ. თავზე დიდ ბეწვიან ქუდს ახურავენ, მატყლის ან თხის ბალანის ულვაშებს უკეთებენ და დიდ ჩიბუხს აჭერინებენ), მეორეს (მამაკაცს) პატარძლად კაზმავენ. ბერიკის კაცები ბერიკის ბრძანებისამებრ მოქმედებენ. მაყურებლები ცდილობენ პატარძალი მოიტაცონ.

ჩვენამდე ბერიკაობის 100-მდე სიუჟეტია მოღწეული. მათი უმეტესობა კომიკურია და ძირითადად შექმნილია საყოფაცხოვრებო თემაზე. ბერიკაობა სამგვარი წყობისაა: კარდაკარ სასიარულო, მოედანზე სათამაშო და სადარბაზო.

სამცხე–ჯავახეთში სადარბაზო ბერიკაობაა გავრცელებული. ბერიკაობა წლების განმავლობაში ადიგენის სოფლებში, უდესა და არალში და ახალციხეში, ვალეში იმართებოდა. ბოლო წლებში, ხალხური წარმოდგენა სულ უფრო იშვიათად იმართება.

[თინათინ ზაზაძე, ადიგენი]