ბაღდათი–აბასთუმნის გზის ხუთკილომეტრიანი მონაკვეთის რეაბილიტაცია დასრულდა

ქუთაისი-ბაღდათი-აბასთუმანი-ბენარას გზის სარეაბილიტაციო სამუშაოები ეტაპობრივად ხორციელდება. საავტომობილო გზების დეპარტამენტის ინფორმაციით, ბაღდათის მუნიციპალიტეტში 4,6 კმ-იანი მონაკვეთის რეაბილიტაცია უკვე დასრულდა და აქ ასფალტ–ბეტონის საფარის გზა მოეწყო.

სარეაბილიტაციო სამუშაოები დაწყებულია აბასთუმნის მხრიდანაც.

ბაღდათი–საირმე–აბასთუმნის გზაზე 3,2 კმ–იან მონაკვეთს შპს „არალი“ 3 099 328 ლარად აკეთებს. აღნიშნულმა კომპანიამ საავტომობილო გზების დეპარტამენტის მიერ გამოცხადებულ ტანდერში გაიმარჯვა და სამუშაოების დასასრულებლად სატენდერო დოკუმენტების მიხედვით მას ექვსთვიანი ვადა აქვს.

„სამუშაოები უკვე დავიწყეთ, სარეაბილტიაციო მონაკვეთი აბასთუმნის გასასვლელიდან ე.წ. საკალმახეების ტერიტორიამდე არსებულ გზას მოიცავს“, – აცხადებენ შპს „არალში“.

საავტომობილო გზების დეპარტამენტის ინფორმაციით ზეკარის უღელტეხილზე გზის სრული რეაბილიტაცია იგეგმება: „თუმცა, ამ ეტაპზე იმ მონაკვეთების რეაბილიტაციაა დაგეგმილი, რომელებიც პირველ რიგში საჭიროებენ აღდგენას“.

უწყებაში ამბობენ, რომ ბაღდათი აბასთუმნის გზის რეაბილიტაცია განსაკუთრებით მნიშვნელოვანი ტურიზმის განვითარების თვალსაზრისითაა: „ამ გზის რეკონსტრუქცია მნიშვნელოვნად გაზრდის მომსახურების დონეს, ასევე შეამცირებს სამგზავრო მანძილს და დროს, დაახლოებით 90-120 წუთს, საქართველოს ცენტრალური ნაწილიდან თურქეთის საზღვრამდე“.

[თამუნა უჩიძე, ახალციხე]