დაზიანებული შადრევანი ძველით ჩაანაცვლეს [Photo]

ახალციხეში, შოთა რუსთაველის ძეგლის პირდაპირ მდგარი შადრევანი დაახლოებით ორი კვირის წინ დაზიანდა. დაზიანების მიზეზს ადგილობრივ თვითმმართველობაში ვერ აკონკრეტებენ.

- ”რამდენიმე დღის წინ გადმონგრეული დაგვხვდა, ვიდეო კამერების მიერ არ არის დაფიქსირებული, რომ ვინმემ გააფუჭა”, - ამბობს ახალციხის მუნიციპალიტეტის გამეგბლის მრჩეველი იურიდიულ საკითხებში გოჩა პარუნაშვილი.

რამდენიმე დღის წინ დაზიანებული შადრევანი ადგილობრივმა თვითმმართველობამ სხვა შადრევნით ჩაანაცვლა, რომელიც თამარაშვილის ქუჩაზე, სადაც ამჟამად იუსტიციის სახლი დგას, ამ ადგილას არსებულ სკვერში იყო დამონტაჟებული.

- ”ის შადრევანი ისევ ძველით ჩავანაცვლეთ, რომელიც ერთ-ერთი სკვერიდან იყო აღებული და შენახული გვქონდა, ცოტა გვერდი აქვს ჩამომტვრეული, მაგრამ შევაკეთებთ. ახლის საყიდლად ბიუჯეტიდან თანხას ვერ გამოვყობთ. წინა მთავრობის მსგავსად ჩვენ ფასადებში დიდ თანხებს ვერ დავხარჯავთ, ჩვენ ფასადური მთავრობა არა ვართ”, - ამბობს გოჩა პარუნაშვილი.

მისივე თქმით, შადრევნის ყიდვის ნაცვლად ადგილობრივ ხელისუფლებას ურჩევნია თანხა გაჭირვებული ადამიანების დახმარებას მოახმაროს.



[ნუკა სტეფნაძე, ახალციხე]