კოსმოსურ ჰაკათონში ახალციხელმა ახალგაზრდებმა გაიმარჯვეს

კოსმოსური ჰაკათონის მთავარი თემა მარსის კოლონიზაცია იყო.

სალომე თათოშვილი ივანე ჯავახიშვილის სახელობის თბილისის სახელმწიფო უნივერსიტეტის სამედიცინო ფაკულტეტის პირველი კურსის სტუდენტია, ხოლო დავითი სანდ-დიეგოს სახელმწიფო უნივერსიტეტის ბიოქიმიის ფაკულტეტზე სწავლობს.

„ჩვენს სისტემას ქვია ციანოცირკულაცია. ციანობაქტერიებს ვიყენებთ იმისათვის, რომ წარმოვქმნათ ჟანგბადი მარსზე. ამ ბაქტერიებს სჭირდებათ ოპტიმალური პირობები, რაც ჩვენი სისტემის საშუალებით შევუქმენით. ამ მექანიზმით საცხოვრებელ გარემოში ჟანგბადი შეაღწევს. მარსზე ყველა მაცხოვრებლის ხელზე იქნება ე.წ საათის მსგავსი მოწყობილობა, რომელიც ზომავს ჟანგბადს ადამიანის ორგანიზმში, ასევე ტემპერატურასა და ტენიანობას ჰაერში“, – გვიხსნის სალომე თათოშვილი.

მისი თქმით, ის მექანიზმი, რომელიც მეგობართან ერთად შექმნა, მარსზე დასახლებისთვის აუცილებელი პირობაა.

კოსმოსური ჰაკათონი თბილისში 3 დეკემბერს დასრულდა. ამ დღესვე დააჯილდოვეს გამარჯვებული მონაწილეებიც.

გამარჯვებული გუნდი ნიდერლანდებში მიემგზავრება, ევროპის კოსმოსური სააგენტოს მუზეუმის, Space Expo-ს სანახავად. მეორე და მესამე ადგილის მფლობელები საჩუქრად მიიღებენ ტექნიკის ვაუჩერებს.

ჰაკათონში მონაწილეობა ნებისმიერ 18-დან 25 წლამდე ახალგაზრდას შეეძლო. მთავარი მიზანი კი კოსმოსთან დაკავშირებული ახალი იდეების და მეცნიერებითა და ტექნოლოგიებით დაინტერესებული ახალგაზრდების წახალისება იყო.

კოსმოსური ჰაკათონის ორგანიზატორები არიან ამერიკის შეერთებული შტატების საელჩო საქართველოში და არასამთავრობო ორგანიზაცია დემოკრატიის ლაბორატორია.

[თინათინ ზაზაძე, ახალციხე]