ჰაკატონი “ინოვაცია ონლაინ მედიაში”

ჰაკატონის თემაა “ინოვაცია ონლაინ მედიაში”. ღონისძიება, რომელიც პროექტის „დამოუკიდებელი მედიის გაძლიერება საქართველოში, მოლდოვასა და უკრაინაში“ ფარგლებში გაიმართება, მიზნად ისახავს ახალი ონლაინმედიისთვის ახალი ტექნოლოგიური რესურსების და აპლიკაციების შემუშავებას.

სამი საუკეთესო საპროექტო იდეა დაფინანსდება 4,500 აშშ დოლარის ოდენობის გრანტით და განხორციელდება.

სამდღიანი მედია ჰაკატონი 2017 წლის 22-24 დეკემბერს გაიმართება. ჰაკატონში მონაწილეობას მიიღებენ გუნდები, რომლებიც საინფორმაციო მედიასაშუალებებს, სტარტაპებს და საინიციატივო ჯგუფებს წარმოადგენენ და გააჩნიათ საინტერესო და ინოვაციური იდეა ონლაინმედიის გასაუმჯობესებლად (თხრობის ახალი მეთოდები, აუდიტორიასთან ინტერაქცია, მონეტიზაცია).

გუნდი შეიძლება შედგებოდეს ორი ან სამი მონაწილისგან (ჟურნალისტი, დეველოპერი ან/და ვებ დიზაინერი). გუნდები მონაწილეობას მიიღებენ გამოცდილი ქართველი და უცხოელი ექსპერტების ტრენინგსესიებში, მათი დახმარებით გააუმჯობესებენ საპროექტო იდეებს და საკონკურსო ჟიურის წარუდგენენ გრანტის მოსაპოვებლად.

განაცხადის წარდგენის ბოლო ვადაა 11 დეკემბერი, 2017, 18:00. განაცხადის შევსება შესაძლებელია შემდეგ მისამართზე https://goo.gl/yvXFjH . განაცხადს, გუნდის სახელით, ავსებს მისი ერთ-ერთი წევრი.

პროექტი “დამოუკიდებელი მედიის გაძლიერება საქართველოში, მოლდოვასა და უკრაინაში“ მიზნად ისახავს ინფორმაციის ხელმისაწვდომობის გაზრდას და მედიაწიგნიერების ხელშეწყობას საქართველოში, მოლდოვასა და უკრაინაში.