იური ჯიმშერაძემ სასამართლოდან სარჩელი უკან გამოიხმო

იური ჯიმშერაძე სასამართლოში შეტანილი სარჩელი, იმ ადმინისტრაციული აქტების გაუქმებას ითხოვდა, რომლის მიხედვითაც, ქონების ეროვნულმა სააგენტომ სოფელ ჭელაში არსებული მიწის ნაკვეთი ჯერ სახელმწიფოს დაურეგისტრირა, შემდეგ კი, ბრძანების საფუძველზე, ადიგენის გამგეობის ბალანსზე გადააფორმა.

„ჩვენ სასამართლოში სხდომაზე, უკვე სარჩელის დასაშვებობაზე უნდა გვემსჯელა. ვიცოდით, რომ მოსამართლე დაუშვებლად ცნობდა, ეს საკითხი ჯერ ეკონომიკის სამინისტროს უნდა განეხილა, ამიტომ, დავასწარით და გამოვითხოვეთ უკან“,–განმარტავს იოსებ ხითარიშვილი.
იური ჯიმშერაძე ახლა იგივე მოთხოვნით ეკონომიკის სამინისტროს მიმართავს, უწყებიდან პასუხის მიღების შემდეგ კი გადაწყვეტს, შეიტანოს თუ არა ადმინისტრაციული სარჩელი ახალციხის რაიონულ სასამართლოში.

შეგახსენებთ, რომ სოფელ ჭელის მკვიდრმა იური ჯიმშერაძემ, ადიგენის საკრებულოს, საკუთარი საცხოვრებელი სახლის მომიჯნავედ ტერიტორიის დარეგისტრირებისათვის, ჯერ კიდევ ერთი წლის წინ მიმართა. საკრებულომ საკითხის განხილვა რვა თვის შემდეგ დაიწყო და ჯიმშერაძეს მიწა არ დაურეგისტრირა, რაც იმით ახსნა, რომ ეს ჭელის მოსახლეობის მოთხოვნა იყო, რადგან ადგილზე სტადიონის მშენებლობა სურდათ.

იური ჯიმშერაძე აცხადებდა, რომ საკრებულომ ეს გადაწყვეტილება მისი რელიგიური და პოლიტიკური შეხედულებების გამო მიიღო და სასამართლოში უჩივლა. სასამართლომ მშინ ჯიმშერაძის მოთხოვნა ნაწილობრივ დააკმაყოფილა, თუმცა ადიგენის გამგეობამ, ქონების ეროვნული სააგენტოს დახმარებით მიწის ნაკვეთი მაინც დაირეგისტრირა.

ჯიმშერაძე ამბობს, რომ მიწის ნაკვეთს 1980 წლიდან ამუშავებდა და ეს მისი ოჯახის შემოსავლის ერთ-ერთი წყარო იყო.

[ლუბა გიორგაძე, ადიგენი]