ელგუჯა მაზმიშვილმა სასამართლოში სარჩელი უკან შეაბრუნა

ელგუჯა მაზმიშვილმა ახალი სასარჩელო მოთხოვნით, რაიონულ სასამართლოს რამდენიმე დღის წინ მიმართა.

„მოთხოვნა იგივეა, არაფერი შეცვლილა, უბრალოდ ეს ყველაფერი კანონის ფარგლებში ხდება“, -ამბობს მისი ადვოკატი ნუგზარ სამარჯიშვილი.

როდის გაიმართება სასამართლო სხდომა, მხარეებისთვის ჯერ ცნობილი არ არის.

შეგახსენებთ, რომ ელგუჯა მაზმიშვილმა სარჩელი სასამართლოდან 10 მაისს, სასარჩელო ვადის ამოწურვის გამო გამოითხოვა.

საქმე ეხება თამარაშვილის ქუჩაზე, საპატრულო პოლიციის ეზოში მდებარე ტერიტორიას, სადაც ახლა საბავშვო ატრაქციონია განთავსებული.

ამასთან დაკავშირებით, მაზმიშვილმა ახალციხის რაიონულ სასამართლოს პირველად 2015 წლის 20 ნოემბერს მიმართა. სარჩელით იგი ოთხ უწყებას: ეკონომიკის სამინისტროს, იუსტიციის სამინისტროს საჯაროო რეესტრს, შსს-სა და ეკონომიკის სამინისტროს სსიპ სამცხე-ჯავახეთის მომსახურების ცენტრს ედავებოდა. სარჩელის მიხედვით, მაზმიშვილი მათგან 2010 წელს შსს-ს მიერ, 19 კვადრატული მეტრი ფართის რეგისტრაციის გაუქმებასა და საკუთრებაში დაბრუნებას ითხოვდა.

თუმცა, სადავო ტერიტორიაზე მხარეები მორიგდნენ და მაზმიშვილს ალტერნატიულ ფართს შსს-ს ნაცვლად, ახალციხის მერია გადასცემს.
როგორც ადვოკატი ნუგზარ სამარჯიშვილი განმარტავს, აღნიშნულზე ტექნიკური პროცედურებია დარჩენილი და მოსამართლე საბოლოო გადაწყვეტილებას გამოაცხადებს.

[ლუბა გიორგაძე, ახალციხე]