საქველმოქმედო ღონისძიება ახალციხეში

სამცხე-ჯავახეთის სახელმწიფო სასწავლო უნივერსიტეტს წმინდა ბარბარეს სახელობის ნინოწმინდის ბავშვთა სახლის 30 აღსაზრდელი და ოთხი აღმზრდელი ესტუმრა. აღსაზრდელებმა ღონისძიებაზე სიმღერები, ლექსები და ცეკვები წარმოადგინეს.

”ძალიან დიდი მადლობა ყველას, ვინც ამ ღონისძიებას დაესწრო და ვინც გვერდით დაგვიდგა. ძალიან კარგი შთაბეჭდილებები მაქვს”, - ამბობს ნინოწმინდის ბავშვთა სახლის აღსაზრდელი თამარ შაფიევი.

უნივერსიტეტის თვითმმართველობამ ღონისძიებისთვის მზადება სამი კვირის წინ დაიწყო.

”იდეა დეკემბერში გაჩნდა, თუმცა, ღონისძიებაზე მუშაობა სამი კვირის წინ დავიწყეთ. სტუდენტებმა მთელი ქალაქი შემოვიარეთ, პროდუქტი და თანხა შევაგროვეთ. შესაწირი ყუთები უნივერსიტეტის ორივე კორპუსში დავდგით და გარკვეული თანხა აქედანაც შემოვიდა”, - ამბობს უნივერსიტეტის თვითმმართველობის პრეზიდენტი ზაზა ზედგინიძე.

მისივე თქმით, სხვადასხვა დაწესებულებებმა საკმაოდ კარგი შესაწირები გაიღეს.

”მაგალითად ”ბილაინმა” ბავშვთა სახლს სარეცხი მანქანა აჩუქა, თავდაცვის სამინისტროს შეიარაღებულმა ძალებმაც სერიოზული შესაწირი გაიღო. ყველას დიდ მადლობას ვუხდი დახმარებისთვის”.

საქველმოქმედო ღონისძიება სამცხე-ჯავახეთის სახელმწიფო სასწავლო უნივერსიტეტის თვითმმართველობის ინიციატივით მოეწყო. საღამო ახალქალაქისა და კუმურდოს მეუფეს ლოცვა-კურთხევით და მამა ტიმოთეს დახმარებით გაიმართა.

ღონისძიების შემდეგ ბავშვებმა ახალციხის ციხე დაათვალიერეს და უნივერსიტეტის რექტორს შეხვდნენ.

[ნინო ზედგინიძე, ახალციხე]